Madaxweyne Deni ayaa wafdi culus la tagay Kismaayo, oo ay ka mid yihiin wasiiro, xildhibaano iyo siyaasiyiin hore uga tirsanaa maamulka Puntland.

Dowladda Jubaland ayaa martigalineysa shirka Kismaayo oo la filaayo in laga soo saaro go’aano waaweyn oo saameeya siyaasadda cakiran ee Soomaaliya.

Garoonka diyaaradaha Kismaayo, waxaa wafdiga madaxweyne Deni ku soo dhoweeyay madaxweynaha Jubaland, Axmed Maxamed Islaan (Madoobe) iyo dadweyne ka mid ah kuwa reer Kismaayo.

Waxaa kaloo maanta Kismaayo gaaray siyaasiyiin uu ka mid yahay Ra’isul Wasaarihii hore Xasan Cali Khayre.

Waxaa la filayaa in wafdi uu hoggaaminaayo Madaxweynihii hore Shariif Sheekh Axmed ay iyaguna gaaraan Kismaayo.

The post Madaxweyne Deni oo Kismaayo la tagay wafdi culus kahor shirka isbahaysiga mucaaradka appeared first on Kaab TV.

Colaadahan, oo ay sii huriyeen hubka tirada badan ee galaya gacanta maleeshiyaadka qabaa’ilka, ayaa si xawli ah ugu faafaya gobollada dalka, gaar ahaan Hiiraan, Shabeellaha Dhexe, Shabeellaha Hoose, Gedo, Bakool, Galgaduud iyo Mudug.

Colaadahan ayaa inta badan salka ku haya is qabqabsiga qabaa’ilka u dhexeeya ee ku aaddan kheyraadka biyaha, dhulka daaqsinka, iyo murannada dhulalka.

Waxaa sidoo kale taagan muranno la xiriira aanooyinka beelaha dhexdooda oo horey dad isaga dilay, kuwaas oo dib u soo laba kacleeyay.

Maleeshiyaadka qabaa’ilka ayaa isku adeegsanaya hubka culus oo ay ku jiraan qoryaha lidka diyaaradaha iyo gawaarida gaashaaman, taasoo kordhisay baaxadda khasaaraha colaadahan ay sababeen.

Colaadaha hadda taagan iyo meelaha ay ka dhacayaan

Shabeellaha Hoose –  waxaa ka taagan colaad ka socota degmooyinka Yaaqbiri Weyne, Wanla-Weyn, tuulooyin hoostaga Afgooye iyo Qoryooley.

Colaadda Yaaqbiri Weyne ayaa ka bilaabatay muran ka dhashay maamulka suuqa xoolaha ee Yaaqbiri Weyne oo u dhexeysa qabiilada Gaaljecel iyo Raxanweyn iyo Habargidir. Inta la og yahay waxaa ku dhintay dad ka badan 14 ruux oo ay ku jiraan labo haween iyo labo carruur ah.

Waxaa sidoo kale taagan xiisad degmada Marka ee xarunta gobolka Shabeellaha Hoose.

Gobolka Shabeellaha Hoose ayaa ah gobollada ugu kheyraadka badan ee dhanka beeraha, xoolaha nool iyo kalluumeysiga. Hase yeeshee waxaa badi gobolka ka taliya kooxda Al-Shabaab.

Maamulka Gobolka Shabeellaha Hoose ayaa sheegay in colaadaha soo laa-laabtay ay dib u dhac ku yihiin amaanka gobolka.

Shabeellaha Dhexe – Gobolka Shabeellaha Dhexe waxaa ka taagan colaad deegaanada Mahaday iyo duleedka Jowhar, halkaas oo beelaha Jareer iyo Abgaal ay ku dagaalamayaan. Dhanka kale colaadda beelaha Gaaljecel iyo Jareer ayaa ka socota dhulka wabiga ku teedsan, halka beelaha Cabdalla Caroone iyo Celi ay isku haystaan Cadalle.

Degaanka Qalimow waxaa ku dagaallamaya maleeshiyaadka beelaha Moobleyn iyo Jareer Weyne.

Colaadahaan ayaa sababtay dhimasho gaareysa 7 ruux.

Hiiraan – Shabeellaha Dhexe –  Xuduudda u dhexeysa Hiiraan iyo Shabeellaha Dhexe waxaa muddo toddobaadyo ah ka soconaya colaad qabiil oo u dhexeysa Xawaadle iyo Abgaal, taas oo salka ku haysa dilal aanooyin hore.

Oday dhaqameedyo isku dayay inay xalliyaan colaadda ayaa sheegay inay ku guul dareysteen ka dib markii lasoo qaban waayey maleeshiyaad horey dad ugu dilay deegaanka Ceel Baraf horraantii bishii Jannaayo ee sannadkaan.

Maamulka Hirshabeelle rasmi ahaan ugama hadlin colaaddan.

Dhanka kale, maamulka degmada Matabaan ee gobolka Hiiraan ayaa horraantii bishaan walaac ka muujiyay colaad labo beelood u dhexeysa oo ka taagan degmada Matabaan. Beelaha Xawaadle iyo Habargidir ayaa dilal arxan darro isugu geystay degmada Matabaan waxaana weli taagan dirirta.

Bakool – Degmada Xudur ee gobolka Bakool waxaa ka taagan colaadda beelo isku degaan ah, kuwaas oo muran ka dhashay dilal iyo kufsi haween loo geystay oo deegaanka ka dhacay.

Dhimasha ka dhalatay colaadaan ayaa haatan mareysa ku dhowaad 10.

Dadaallo ay sameeyeen xubno ka tirsan maamulka Koonfur Galbeed ayaanan saamixin in si buuxda colaadda loo demiyo.

Maamulka Dowlad Goboleedka Koonfur Galbeed Soomaaliya ayaa bilo ka hor ku dhawaaqay in ay qaadayaan tallaabooyin adag oo lagula xisaabtamayo dadka lagu eedeeyay in ay hurinayaan colaadaha u dhexeeya beelaha.

Galgaduud – Gobolka Galgaduud oo ah meelaha ugu daran ee ay colaadda isirka qabiilka ku saleysan ka taagan tahay ayaa waxaa ka fuean dhowr furin colaadeed.

Maleeshiyaad kasoo jeeda beelaha Mareexaan iyo Dir ayaa dagaallo goos goos ah ku dhexmarayaan deegaanka Xeraale iyo magaalada Caabudwaaq.

Tirada dhimashada ka dhalatay dagaalkan ayaa Sabtidii toddobaadkii hore gaartay 18, siday warbaahibta gudaha sheegtay.

Dhanka Cadaado waxaa colaad daba dheeraatay oo dhimasho badan sababtay ay ku dhexmareysaa qabaa’ilada Mareexaan iyo Habargidir taas oo galaafatay nolosha tobaneeyo ruux oo ay carruur ku jiraan, halka degmada Dhuusamareeb ee xarunta maamulka Galmudug ay isku ugaarsanayaan maleeshiyo beeleed isku heyb ah oo ka wada tirsan Habargidir kuwaas oo dhowaan dad kala dilay.

Maamulka Galmudug ayaa baaqyo soo saaray marar badan, inkasta oo aan xal waara loo helin colaadda.

Maamullada Puntland iyo Galmudug ayaa iyaguna la daalaa-dhacaya deminta colaadda beelaha Leelkase iyo Habargidir taasoo galaafatay 20 meeyo ruux oo u badan dad reer miyi ah oo ay haween ku jiraan.

Gedo – Degmada Luuq ee gobolka Gedo ayaa waxaa dib u soo laba kacleeyay colaaddii u dhexeysay beelaha Mareexaan iyo Raxanweyn taas oo ka bilaabatay muranka deegaanka ah. Masuuliyiin ka tirsan Jubaland ayaa horey u shaaciyay in la dhameeyay colaaddam hase ahaatee waxaa dib u soo laabtay colaadda.

Dad ka badan 700 ayaa ka barakacay degmada Luuq colaaddan darteed, kuwaas oo badankood aan weli ku laaban karin guryahooda.

The post Dagaal beeleedyo dhiig badan ku baxayo oo koonfurta iyo bartamaha Soomaaliya ka ololaya appeared first on Kaab TV.

Soomaaliya ayaa wajahaysa duulaan adag oo kasoo wajahaya kooxda Al-Shabaab oo ku xiran ururka al-Qaacida ee argagixisada ah.

Agaasimaha Sirdoonka Soomaaliya, Mahad Maxamed Salaad, oo ah xubin ka tirsan ururka Ikhwaanul Muslimiinka ayaa la sheegay in dhowaan uu safar qarsoodi ah ku tagay dalalka Algeria iyo Azerbaijan.

Ilo sirdoon ayaa xaqiijiyay in Mahad Salaad uu waday codsi ka yimid Soomaaliya, kaas oo ay Dowladda Soomaaliya ku dalbanayso in laga caawiyo sidii ay ku heli lahayd diyaaradaha droneska ee  Kamikaze.

Xogta ayaa intaa ku daraysa in cadadka uu Mahad Salaad codsaday ay tahay 25,000 xabo oo Kamikaze ah.

Dagaalka Al-Shabaab

Kooxda Al-Shabaab, oo dagaal labaatan sano ku dhow kula jirta dowladda Soomaaliya iyo ciidanka Midowga Afrika, ayaa si xawli ah ku socota iyada oo isku fidisay dhammaanba magaalooyinka ku hareereysan caasimadda Soomaaliya ee Muqdisho.

Waxaa jirta cabsi weyn oo laga qabo in kooxda Al-Shabaab ay qabsan karto Muqdisho.

Dhanka kale, waxaa dhowaan guuldareystay wada hadal ay dowladda Xasan Sheekh Maxamuud kula jirtay kooxda argagixisada, kaas oo ay dhex dhexaadinaysay Dowladda Qatar.

Waxaa wada hadalka qeyb ka ahaa odayaal iyo ganacsato xiriir dhow la leh kooxda mintidka ah.

Halista ka iman karta kamikaze

Al-Shabaab laftooda ayaa si weyn u baadi-goobaya inay helaan diyaaradaha droneska ee weerarada is-qarxinta qaadi kara.  Waxay kooxdu wada hadallo kula jirtay Xuutiyiinta Yemen oo ay ka dalbadeen in la siiyo drones.

Xuutiyiinta Yemen ayaa taageero ka hela Iran.

Kooxda Al-Shabaab ayaa sannado badan dhexgal ku wadday hay’adaha dowladda Soomaaliya, iyadoo musuqmaasuqa uu xadka ka baxay. Al-Shabaab waxay si joogto ah u helaan qalabka ciidan iyo xogta ay u baahan yihiin taasoo u fududeyn karta inay si fudud ku heleen drones-ka kamikaze haddii ay Soomaaliya keensato.

Al-Shabaab waxay kaloo weeraro joogto ku qaadaan xeryaha ciidamada oo ay hub, rasaas, gaadiid iyo agab kale ku qabsadaan, waxaana suuragal ah in haddii drones casri ah oo is qarxin kara la keeno Muqdisho ay u gacangali karaan mintidiinta.

Iran oo soo saarta diyaaradaha drones ee Kamikaze ayaa adduunyada kaga jirta go’doon cunaqabateyno saaran darteed. Waxaana dalalka reer Galbeedka ay u arkaan xukuumadda Tehran mid taageerta argagixisada caalamiga ah.

Algeria oo ah waddan ka tirsan Jaamacadda Carabta ayaa la rumeysan yahay inay xiriir wanaagsan la leedahay xukuumadda Tehran.

Soomaaliya ayaa sida iluhu sheegayaan dooneysa in laga caawiyo lacagta lagu soo iibinaayo droneska Kamikaze iyo soo daabulidda droneska.

Kamikaze waa nooc drones ah oo loo adeegsan jaro is qarxinta goobaha dagaalka.

Ruushka ayaa horey ugu adeegsaday Kamikaze (Shahed‑136 iyo Shahed‑131) dagaalka Ukraine, waxaana la rumeysan yahay in Iran ay Ruushka siisay Kamikaze kuwaas oo ay xukuumadda Vladamir Putin u adeegsatay duullaanka Ukraine.

Hay’adda Nabadsugidda Soomaaliya ee NISA rasmi ahaan ugama hadlin dalabkan ay ku dooneyso drones-ka Iran ee Kamikaze.

Muqdisho lafteeda ayaa si tartiib ah u soo celineysay xiriirka Iran, iyadoo dowladda Soomaaliya bishii July 2024 ay wafdi uu hoggaaminayey Ra’isul Wasaare Xamsa Cabdi Barre u dirtay dalka Iraq halkaas oo la rumeysan yahay inay kulamo kula soo yeesheen xubno ay ku jiraan sirdoonka Iran oo xiriir la leh kooxda Xuutiyiinta ee Yemen.

The post Soomaaliya oo raadinaysa drones Iran soo saarto ee kamikaze appeared first on Kaab TV.