MOGADISHU (KAAB TV) – Ciidamada Booliska dalka Somaliya ayaa gacanta ku dhigay nin gacan ku dhiigle ah oo baxsad ka ahaa Garoonka Aadan Cadde ee Magaalada Muqdisho. Eedeysanaha oo lagu magacaabo Maxamed Cumar Ciise, ayaa loo heystaa inuu Marxuum Maxamed Axmed Faarax ku dilay Gobalka Nugaal 17-kii May, 2023-ka.
Ciise ayaa dilka kadib u baxsaday dalka Kenya, waxaana uu ku hoos noolaa magaciisii Cabduqaadir Cumar Cali si uu uga baxsado in la qabto. Booliska Soomaaliya oo kaashanaya booliska caalamiga ah ee Interpol ayaa la wadaagay xogtiisa, taasoo keentay in la aqoonsado, ugu dambeyntiina xabsiga la dhigo.
War ka soo baxay Booliska Soomaaliya ayaa lagu faahfaahiyay in Ciise uu warqad aqoonsi ah oo been abuur ah ka qaatay Safaaradda Soomaaliya ee Kenya 21-kii June 2024, markii lagu qabtay garoonka diyaaradaha ayuu isku dayay inuu dib ugu laabto Soomaaliya.
Maxkamadda gobolka Nugaal ee Puntland ayaa codsatay in loo soo gacan geliyo Ciise, waxaana la filayaa in dhawaan lagu wareejiyo xukunkooda.
Dhacdadan ayaa muujinaysa wada shaqaynta ka dhaxaysa booliiska caalamiga ah ee Interpol iyo booliiska Soomaaliya ee ku aaddan dabagalka iyo soo qabashada dadka baxsadka ah.