Garoowe (KAAB TV) – Maamulka Puntland, ayaa isku diyaarinaya duullaan ka dhan ah kooxaha hubeysan ee Daacish iyo Al Shabaab ee ku sugan deegaannada maamulkaasi, waxaana hadda soo baxaya digniino amni oo la xariira weeraro ay fulin karaan kooxahaasi weerarka lagu yahay.
Sidoo kale, Saraakiisha amniga u qaabilsan maamulka Puntland, ayaa soo saaray digniin amni oo ku saabsan in taxaddar dheeri ah laga muujiyo falalka amni-darro oo laga cabsi qabo kooxaha argagixisada ah ka samayn karaan magaalooyinka waaweyn e Puntland.
Dhanka kale, Afhayeenka booliska Puntland G/sare Xasan Cabdullaahi Maxamed, ayaa ugu baaqay laamaha amniga in ay galaan feejignaan dheeri ah, waxa uu sidoo kale shacabka Puntland ka codsaday in taxadar dheeraad muujiyaan si looga hortago dhagarta kooxaha argagaxisada uu ku tilmaamay.
“Waxaa la faraya ciidamada magaalooyinka waaweyn iyo kuwa yar yar amnigoda sugaya in ay taxaddar dheeri ah muujiyaan oo ay xil iska saaraan dhaq dhaqaaqa gaadiidka iyo hubinta qof islamarkaana waajibkooda ka gutaan, sidoo kale waxaa la farayaa ciidamada in ay hubiyaan gaadiidka iyo dadka safarka ah , si aysan argagaxisada ugu soo dhax dhuuman” ayuu yiri afhayeenka booliiska Puntland.
Afhayeenka ayaana si gaar ah ugu baaqay dadka shacabka ah in ay yareeyaan isu imaatinka goobaha dadweynaha isugu tagaan sida hoteelada iyo goobaha kale ee ganacsi , waxa uuna ugu baaqay haddii ay arkaan wax amniga liddi ku ah ku wargaliyaan laamaha amniga.
Sikastaba, digniintan amni ayaa kusoo aadeysa xilli kooxda Dacaish labo maalin kahor weerar ismiidaamin iyo mid toos ah ku qaadeen goob ay joogeen ciidamada Puntland ee isku diyaarinaya howlgalka buuraha gobolka Bari looga sifeenayo kooxaha argagaxaisada ah.