Muqdisho (KAAB TV) -Azerbaijan ayaa si rasmi ah u ansixisay heshiis laba geesood ah oo ay la gashay Soomaaliya Arbacadii si loo kordhiyo iskaashiga dhanka waxbarashada.
Madaxweyne Ilham Aliyev ayaa saxiixday wareegto lagu ansixiyay “Heshiiska Iskaashiga ee dhinaca Waxbarashada” ee u dhexeeya Wasaaradda Sayniska iyo Waxbarashada ee Jamhuuriyadda Asarbayjaan iyo Wasaaradda Waxbarashada, Hiddaha iyo Tacliinta Sare ee Jamhuuriyadda Federaalka Soomaaliya.
Heshiiska ayaa lagu saxiixay magaalada Baku Feb 12, 2025, xilligaasoo uu booqasho rasmi ah ku joogay madaxweynaha Soomaaliya Xasan Sheekh Maxamuud.
Wareegtada ka dib, Wasaaradda Sayniska iyo Waxbarashada Asarbayjaan ayaa loo xilsaaray fulinta qodobbada heshiiska. Wasaaradda arrimaha dibadda ee dalka ayaa ku wargelin doonta dowladda Soomaaliya marka la dhammeeyo dhammaan habraacyada gudaha ee looga baahan yahay dhaqan galka heshiiska.
Heshiiska ayaa ahaa mid ka mid ah dukumeentiyo dhowr ah oo muhiim ah oo lagu kala saxiixday xaflad rasmi ah oo ay ka soo qeyb galeen madaxweynayaasha Aliyev iyo Mohamud oo ka dhacay caasimadda Asarbayjaan.
Intii ay xafladda socotay, Ulvi Mehdiyev, oo ah Guddoomiyaha Hay’adda Adeegga Dadweynaha iyo Hal-abuurka Bulshada ee Dowladda Asarbayjaan iyo Cabdixakiim Maxamed Yuusuf, Madaxa Shaqaalaha ee Madaxweynaha Soomaaliya, ayaa is dhaafsaday heshiis is-afgarad ah oo lagu xoojinayo iskaashiga dhanka bixinta adeegyada bulshada.
Wasiirada tamarta ee labada dal ayaa sidoo kale kala saxiixday heshiis is afgarad oo diiradda lagu saaray iskaashiga tamarta cagaaran. Wasiirka Tamarta ee Asarbayjan, Parviz Shahbazov, iyo Wasiirka Tamarta iyo Kheyraadka Biyaha Soomaaliya, Cabdullaahi Bidhaan Warsame, ayaa ballan qaaday in ay ka wada shaqeyn doonaan hindisayaasha la xiriira tamarta la cusboonaysiin karo.
Sidoo kale, Wasiirka Arrimaha Dibadda ee Asarbayjaan Jeyhun Bayramov iyo Wasiirka Arrimaha Dibadda ee Soomaaliya Axmed Macallin Fiqi ayaa isweydaarsaday heshiiska iskaashiga waxbarashada ee la saxiixay ee uu hadda ansixiyay Madaxweyne Aliyev.