Muqdisho (KAAB TV) -Madaxweynihii hore ee Soomaaliya Shariif Sheekh Axmed ayaa magaalada Muqdisho kula kulmay Safiirka Mareykanka ee Soomaaliya Richard Riley oo ay ka wada hadleen horumarka siyaasadda iyo amniga iyo horumarinta hanaanka dowlad dhisidda Soomaaliya.
Kulanka ayaa diiradda lagu saaray xoojinta xiriirka taariikhiga ah ee labada dal iyo sidii loo heli lahaa xasillooni siyaasadeed, xilli Soomaaliya ay isku diyaarineyso doorashooyin guud oo dalka oo dhan ka dhaca sanadka soo socda.
“Waxaan ka wada hadalnay xaaladda guud ee Soomaaliya, gaar ahaan ammaanka iyo siyaasadda, iyo muhiimadda ay leedahay in la horumariyo hannaanka dowlad-dhisidda oo mar walba saldhig u ah xasillooni siyaasadeed,” ayuu Shariif ku yiri qoraal uu soo dhigay kulanka kaddib.
Shariif ayaa sidoo kale uga mahad celiyay dowladda Mareykanka taageerada joogtada ah ee ay ka geysaneyso Soomaaliya, dhinacyada amniga, la dagaalanka argagixisada, iyo gargaarka bini’aadantinimo.
Wadahadalladan ayaa ku soo beegmaya iyadoo ay sii kordhayaan dadaallada diblumaasiyadeed ee lagu doonayo in lagu mideeyo hoggaamiyeyaasha siyaasadda Soomaaliya, laguna taageero isbeddelka dimoqraadiga ah ee dalka. Mareykanka ayaa ku celiyay sida ay uga go’an tahay in ay taageerto dadaallada Soomaaliya ee lagu dhisayo hay’ado dowladeed oo tayo leh inkastoo ay jiraan caqabado siyaasadeed iyo kuwo amni.