Wararka laga helayo deegaanka Wedow ee duleedka magaalada Muqdisho ayaa sheegaya in xalay halkaasi lagu dilay haweeney shacab ah oo ka ganacsanaysay kalluun.
Haweeneyda ayaa la sheegay inay lahayd goob ganacsi oo yar, halkaas oo ay nolol-maalmeedkeeda uga raadsan jirtay iibinta kalluunka. Sida xogta la helayo, dhacdadan ayaa la xiriirta lacag canshuur ah oo askari ka tirsan ciidamada dowladda uu ka dalbaday haweeneyda.
Sida ay sheegeen ilo deegaanka ah, askariga oo la sheegay inuu ka tirsanaa qaybta canshuuraha ayaa haweeneyda ka dalbaday inay bixiso lacag lagu sheegay canshuur dhan 0.25 senti.
Haweeneyda ayaa la sheegay inay askariga u sheegtay in aysan xilligaas haysan lacagta, iyadoo ka codsatay inuu waqti kale kusoo laabto.
Wararka hordhaca ah ayaa intaas ku daraya in muran uu ka dhashay arrinta canshuurta, kadibna askariga uu rasaas ku dhuftay haweeneyda, taas oo keentay inay goobta ku geeriyooto.
Kadib dhacdada, askarigii lagu eedeeyay falka ayaa la sheegay inuu goobta ka baxsaday, iyadoo aan weli si rasmi ah loo xaqiijin halka uu ku sugan yahay iyo in ciidamada ammaanku ay gacanta ku dhigeen.
Meydka haweeneyda ayaa loo qaaday xarunta Dembi-baarista Booliska Soomaaliya (CID), halkaas oo la filayo in baaritaanno dheeraad ah lagu sameeyo.
Dhacdadan ayaa walaac xooggan ka abuurtay deegaanka, gaar ahaan dadka ku nool Wedow iyo nawaaxigeeda oo sheegay inay muhiim tahay in la helo caddaalad iyo isla-xisaabtan.
Dilkan ayaa kusoo aadaya xilli ay Muqdisho iyo nawaaxigeeda ka jiraan cabashooyin la xiriira habka ay qaar ka mid ah ciidamada dowladda ula dhaqmaan shacabka.
Dadka deegaanka ayaa ku baaqay in haddii eedeymaha ku saabsan dilka haweeneydan ay xaqiiqo noqdaan, askariga lagu eedeeyay falka si degdeg ah loo soo qabto, baaritaan madax-bannaan lagu sameeyo dhacdada, lana horgeeyo sharciga.
Dhacdadan ayaa sidoo kale kusoo beegmaysa iyadoo isla Muqdisho ay ka dhaceen dhacdooyin kale oo dhimasho sababay. Wararka hordhaca ah ee la helayo ayaa sheegaya in tiro dad shacab ah lagu dilay magaalada, balse tirada iyo faahfaahinta dhacdooyinkaas ay weli u baahan yihiin xaqiijin rasmi ah.
Qoyska haweeneyda la dilay iyo dadka deegaanka ayaa dowladda ka sugaya inay si cad uga jawaabto dhacdadan, isla markaana ay xaqiijiso in qof kasta oo loo helo inuu si sharci-darro ah u dilay qof shacab ah uu wajaho caddaaladda.