Somaliland ayaa sheegtay inay soo dhoweyn doonto xildhibaan Fihiima Yuusuf Quuje oo ka tirsan baarlamaanka SSC-Khaatumo, kadib markii ay ku dhawaaqday inay ka tanaasushay waxa ay ku tilmaantay fikirkii “Soomaaliweyn”.
Wasiirka Wasaaradda Biyaha Somaliland, Maxamed Cabdimaalik Axmed, oo asal ahaan ka soo jeeda Laascaanood, ayaa sheegay inuu xiriir la lahaa Fihiima ka hor intii aysan ka bixin magaalada Laascaanood.
“Waxaan soo dhoweynaynaa Fihiima oo go’aansatay inay dib ugu soo laabato dalkeeda Somaliland. Waa doorashadeeda,” ayuu yiri.
Wasiirku waxa uu sidoo kale tilmaamay in mas’uuliyiin kale oo ka soo jeeda Laascaanood, kuwaas oo hore uga soo horjeeday Somaliland, ay ka fiirsanayaan inay dib ugu laabtaan Somaliland. Sida uu sheegay, arrintaasi waxay mustaqbalka saamayn ku yeelan kartaa muranka ka taagan gobollada Sool iyo Sanaag.
Gobollada Sool iyo Sanaag waxaa weli ka taagan muran dhinaca maamulka ah, iyadoo Somaliland, Puntland iyo maamulka SSC-Khaatumo ay dhammaantood sheegtaan saamayn ama xuquuq ku saabsan qaybo ka mid ah deegaannadaas.