Eyl Puntland (KAAB TV) – Warar soo baxaaya ayaa sheegaya in Burcad-badeed lagu tuhmaayo in ay Soomaali yihiin afduubteen Doon kalluumeysi oo Yemeni ah meel u dhow Xeebaha Geeska Afrika, sida ay sheegeen mas’uuliyiinta Yemen.
Sidoo kale, War ay soo saareen EUNAVFOR Atalanta, oo ah ciidanka badda ee Midowga Yurub, ayaa lagu sheegay in weerarka lagu qaaday, nooc ka mid ah Doomaha dhaqameed ee isticmaala badda Bariga Dhexe, weerarku wuxuu ka dhacay meel u dhow deegaanka Eyl ee Soomaaliya.
Dhanka kale, Weerarkan ayaa kusoo beegmay toban maalmood kadib markii burcad-badeed kale ay weerareen doon kalluumeysi oo Yemeni ah, taasoo ugu dambeyn burcad-badeeddii ay ka carareen, halka shaqaalihii saarnaa la badbaadiyey iyagoo aan waxyeello gaarin.
Heerka burcad-badeednimo ee Soomaaliya ayaa gaartay halka ugu sareeysa sanadkii 2011, markaas oo ladiiwaan galiyay ku dhowaad 237 weerar burcadadeed, sida lagu sheegay warbixin ay soo saartay hay’adda la socodka burcad-badeedda Oceans Beyond Piracy, falalkan ayaana xilligaas dhaqaale ahaan adduunka ugu kaceen $7 bilyan, halka madaxfurasho ahaan loo bixiyay ilaa $160 milyan oo dollar.
Ugudambeyn, hay’adda Caalamiga ah ee La Socodka Badaha (International Maritime Bureau), ayaa shaacisay sanadkii 2024, in la diiwaangeliyay toddobo weerar oo burcad-badeednimo ah oo ka dhacay xeebaha Soomaaliya.