Galmudug (KAAB TV) -Ciidamada Xoogga dalka Soomaaliyeed iyo qeybaha kala duwan ee bulshada deegaanka ayaa wada abaabul xoogan oo ka dhan ah kooxda Al-Shabaab ee ku sugan qeybo ka mid ah deegaanada maamulka Galmudug sida ay sheegayaan warar hoose oo aan ka heleyno ilo wareedyo lagu kalsoon yahay.
Saraakiil ka tirsan ciidamada xoogga dalka, kuwa daraawiishta Galmudug, iyo maleeshiyaad deegaanka ah ayaa goor dhoweyd kulamo istiraatiji ah la qaatay qeybaha bulshada magaalada Wisil ee koonfurta gobolka Mudug.
Korneyl Xasan Ciraaqi oo ah Taliyaha Guutada 18-aad ee ciidanka xoogga dalka qeybta Gorgor oo ka hadlayay ujeeddooyinka howlgalka ayaa xaqiijiyay in weeraro ballaaran oo ka dhan ah AS ay ka bilaaban doonaan guud ahaan deegaanada Galmudug.
“Haddii siyaasiyiintu ay damcaan inay hoggaamiyaan qarankan, waa inay taageeraan dagaalka dowladda ee ka dhanka ah AS,” ayuu yiri Kornayl Ciraaq isagoo carabka ku adkeeyay baahida muhiimka ah ee loo qabo midnimada dagaalka socda ee ka dhanka ah argagixisada.
Isagoo hadalkiisa sii wata ayaa wuxuu ku booriyay dadka deegaanka inay si firfircoon u taageeraan ciidamada ammaanka dadaallada ay AS uga saarayaan gobolka.
Maalmihii la soo dhaafay ayaa saraakiil sar sare oo ka tirsan dowladda waxa ay booqdeen fariisimaha hore ee dagaalka si ay isugu soo uruuriyaan ciidamada, isla markaana ay u dhiirigeliyaan taliyeyaasha ciidamada si loo dardargeliyo ololaha ka dhanka ah AS.
Hawlgalka ayaa ujeedadiisu tahay in la burburiyo dhufeysyada AS iyo in la gooyo khadadka saadka kooxda ee gobolka. Ilo-wareedyo ciidan ayaa ku soo warramaya in gurmadyo dheeraad ah, oo ay ku jiraan baabuurta gaashaaman iyo hub culus, la dhigay goobo istiraatiiji ah si loo xaqiijiyo guusha weerarka.
Falanqeeyayaasha ammaanka ayaa soo jeedinaya in riixitaankan u dambeeyay uu qayb ka yahay istaraatiijiyad ballaaran oo heer qaran ah oo lagu wiiqayo awoodda AS ee gobollada dhexe ee Soomaaliya. Dowladda Soomaaliya oo kaashaneysa saaxiibada caalamiga ah, ayaa kordhisay dadaallada ciidamada iyo kuwa sirdoonka ee lagu carqaladeynayo howlgallada AS.
Hogaamiyayaasha deegaanka ayaa soo dhaweeyay weerarka, iyagoo u arkayay tallaabo muhiim ah oo loo qaaday dhanka xasilinta gobolka. Xubno badan oo ka tirsan bulshada ayaa muujiyay rabitaankooda ah inay la shaqeeyaan ciidamada amniga iyagoo siinaya xog sirdoon oo ku saabsan dhaqdhaqaaqyada iyo AS.