Calimiskaad (KAAB TV) – Ciidanka ladagaalanka argagixisada Puntland ayaa wada howlgallo ka dhan ah kooxda Daacish, iyagoo gubay saldhigyo ay lahaayeen kooxda Daacish, kaddib markii dagaal xooggan halkaasi looga saaray kooxda Daacish.
Sidoo kale, Taliska ciidamada ladagaalanka argagixisada ee Hilaac ayaa sheegay in la gubay talisyadii argagixisadu ku lahayd buuraha Calmiskaad, halkaas oo kooxda ku laheyd saldhigyo ay gabaad ka dhigan jireen, sidoo kale mararka qaarna ay kasoo abaabuli duullaan.
“Ciidanka hawlgalka ciribtirka argagixisada ayaa gubay talisyo argagixisada Daacish ku lahayd buuralayda Cal-miskaad, waxaana wali sii socda baacsiga kooxdaasi ” ayaa lagu yiri warbixinta kooban ee ka soo baxday taliska ciidanka difaaca Puntland.
Dhanka kale, Saraakiisha hoggaamineysa howlgalka ka dhanka ah kooxda Daacish, ayaa sheegay in ay go’doon galiyeen goobaha ay ku sugan yihiin kooxdaasi, waxa ayna sheegeen saraakiisha in ay ku hareereesan yihiin god talis weyn u ah kooxad Daacish.
Sikastaba, Puntland ayaa markan ku dhawaaqay dagaal ay kusoo afjarayaan kooxaha argagaxsisada ah ee ku sugan buuraha gobolka Bari, Madaxweynaha maamulkaasi ayaana bilo u jooga gobolka Bari hoggaaminta howlgalka ka dhanka ah kooxda Daacish.
