Jowhar (Kaab TV) –Faahfaahino dheeraad ayaa kasoo baxaya gobolka Shabeellaha dhexe in maanta ciidamada Danab iyo kuwa dadka deegaanka howlgallo ka dhan ah Al-Shabaab ay ka sameeyeen gobolkaasi.
Saraakiil u hadashay ciidanka Danab ayaa sheegtay inay burburiyeen saldhigyo ay kooxda ku lahayd halkaasi, kuwaas oo ay kasoo abaabuli jirtay weeraro qorsheysan.
Dhanka kale ma jiro wax hadal ah oo kasoo baxay dhinaca Al-Shabaab oo ku aadan howlgalkaasi ee ay guulaha ka sheegteen ciidamada Danab iyo kuwa Macawiisleyda.
Howlgalladan oo ahaa kuwa qorsheysan ayaa waxaa ciidamada huwanta ay ku beesgadeen goobo ay ku sugnaayeen xoogaga Al-Shabaab sida Ceel Cali, Godle oo dhanka waqooyi ka xiga deegaanka caanka ah ee Ceel Cali ee gobolka Shabeelaha Dhexe.
Xaaladda ayaa haatan ah mid aad u kacsan, waxaana dhaq-dhaqaaqyo iska soo horjeedo laga dareemayaa deegaano dhowr ah oo ka tirsan dowlad goboleedka HirShabelle.
Soomaaliya ayaa ku jirto marxalad dagaal, waxaana la filayaa in haatan wejiga labaad ee howlgalka ka dhanka ah Al-Shabaab uu ka billowdo Koonfur Galbeed iyo Jubbaland.
Shabeelaha Dhexe ayaa kamid ah gobollada lagu jabiyay Al-Shabaab, isla-markaana inta badan laga saaray deegaanada gobolkaasi oo ay ku lahaayeen saldhigyo waa weyn.
Bariga Hiiraan ayaa sidoo kale kamid ah meelaha laga xoreeyay kooxda, halkaas oo ay isku fidiyeen ciidamada Xoogga dalka iyo kuwa dadka deegaanka ee Macawiisleyda.
Balse waxaa jira weeraro gaadmo ah ay soo qaado Al-Shabaab kuwaas oo geysta qasaara fara badan inta badan Al-Shabaab ayaa weeraradeeda u adeegsato qaraxyo kuwaas oo ay kuqaadaan xeryaha ciidamada ay kulee yihiin gobolka Hiiraan.