Dagaal culus oo maalintii sadaxaad ka socda gobolka Hiiraan

Ceel hareeri(KAAB TV) -Wararka ka imaanaya degmada Moqokori ee gobolka Hiiraan ayaa sheegaya in haatan uu dagaal culus ka socdo deegaanka Ceel hareeri, kaasoo u dhaxeeya ciidanka Macawiisleyda beesha Xawaadle iyo kuwa Al-shabaab.

Dagaalka ayaa yimid kadib markii ciidanka Macawiisleeyda Xawaadle ay weerar ku qaadeen xubno ka tirsan maleeshiyaadka oo isku aruursanaayay duuleedka Ceel hareeri.

Waxaa lasoo warinaya in dagaalka uu yahay mid aad u xoogan oo labada dhinac isku adeegsanayaan hubka noocyadiisa kala duwan, waxaana dhawaqa hubka culus ee dagaalka laga maqlaya deegaano ka fog fog Ceel hareeri.

Wararka hordhaca ah ayaa sheegaya in dagaalka uu ka dhashay khasaare dhimasho iyo dhaawacba leh, hayeeshe wali si rasmi ah looma oga khasaaraha dagaalka, maadama ay wali xabadu ka socoto.

Dagaalkaan ayaa kusoo aadaya, iyadoo maanta si weyn looga ciidayo inta badan gobolada dalka si farxad leh maalinta koowaad ee Ciidul Adxa, taasi badal keedana reer Ceel hareeri ayaa ku ciidaya dagaal ay ku doonayaan iney isaga xureeyaan maleeshiyaadka Al-shabaab.

Ugu dambeyntii gobolka Hiiraan ayaa noqday gobolka kaliya uu ka socda dagaalka ka dhanka ah kooxda Al-shabaab guud ahaan gobolada dalka, waxaana dagaalka ka socda Hiiraan ku keli noqday Macawiisleeyda beesha Xawaadle oo markii horaba hogaan u aheyd inuu bilawdo dagaalka dalka looga xureyno Al-shabaab, waxaana xusid in ciidanka dowladda iyo kuwa beelaha kale ee dariska la ah Xawaadle inaysan qeyb ka aheyn dagaalada mudooyinkii dambe ka dhacaayay gobolka Hiiraan.