RIYADH (KAAB TV) – Dhaxal-sugaha Boqortooyada Sacuudi Carabiya, Maxamed Bin Salmaan, ayaa si hoose ugu sheegay suxufiyiinta hadal hanjabaad ah oo ahaa inuu cunaqabatayn ku soo rogi doono Imaaraadka Carabta (UAE) sannadkii hore, sida uu shaaciyay wargeyska Wall Street Journal (WSJ).
Sida laga soo xigtay wargeyska, Maxamed Bin Salmaan ayaa u sheegay koox suxufiyiinta bishii Diseembar 2022 warbixin kooban oo sir ahaan uu u yiri isagoo sheegay inuu u diray Imaaraadka Carabta liis dalabaad ah, wuxuuna uga digay inuu ku soo rogi doono tallaabooyin cunaqabateyn ah oi adag haddii ay sii socoto la xafiiltanka Sacuudiga marka ay timaado arrimaha waaweyn ee siyaasadda Sacuudiga ee gobolka iyo Ururka Waddamada Shidaalka Dhoofiya (OPEC+).
“Way ka sii darnaan doontaa wixii aan ku sameeyay Qatar,” ayuu yiri Dhaxalsugaha Boqortooyada Maxamed Bin Salmaan, isagoo ka hadlayay cunaqabateyntii Qatar 2017 ee Riyadh ay hoggaamineysay, taasoo dowladaha Khaliijka sida Imaaraadka iyo Baxreyn ay saareen dalka yar ee Qatar.
Xayiraaddan ayaa la qaaday 2021-kii.
Bin Salmaan ayaa la sheegay in uu u sheegay saxafiyiinta Sacuudiga in “Imaaraadku uu dhabarka ka tooganayo Sacuudiga”, isagoo uga digay in Abu Dhabi “ay arki doonto waxa aan ku sameyn karo.”
Dhaxal-sugaha Boqortooyada Sucuudiga Maxamed Bin Salmaan iyo Amiirka Imaaraatka Maxammed bin Zayed ayaa muddo dheer la soo wariyay in ay isku xumaayeen ayna isku hayeen ujeedooyinka siyaasadda arrimaha dibadda ee gobolka, gaar ahaan Yemen, halkaas oo labada waddanba ay ku qaadeen dagaal ka dhan ah fallaagada Xuutiyiinta, laakiin, isla mar ahaantaana waxaa labada waddan ee Sacuudiga iyo UAE ka dhexeeya xifaaltan dhanka hoggaanka ah taasoo sii cakirtay arrinta dalka Yemen.
Riyadh iyo Abu Dhabi ayaa sidoo kale ka dhexeeya khilaaf xoogan oo la xiriira dhanka ururka waddamada shidaalka dhoofiya ee OPEC+, oo labaduba xubno ay ka yihiin, laakiin Sacuudi Carabiya ay door hoggaamineed ka qaadaneyso.
Bishii Oktoobar ee sannadkii hore, Imaaraadku waxay ku eedeeyeen deriskooda Sacuudiga inay ku qasbeen inay oggolaadaan in la jaro wax soo saarka saliidda ee waddamada OPEC, taasoo keentay in Imaaraadku ku hanjabo inuu ka baxayo ka mid ahaanshaha ururka OPEC.
In kasta oo ay labada dhinacba ay is dhaafsadeen hanjabaado, haddana labada dal iyo xulafadooda waxay ku guulaysteen inay ka hortagaan in khilaafkoodu cirka isku sii shareero, waxaanay inta badan ka ilaaliyeen inuu u soo baxo saxaafadda iyo goobaha dublamaasiyadda.
Sida laga soo xigtay wargeyska Wall Street Journal oo soo xiganeysa ilo aan la magacaabin, xiisadda u dhexeysa labada nin ee kala hogaamiya UAE iyo Sacuudiga ayaa sii socota ilaa heer ay gaartay in bin Salmaan iyo bin Zayed aysan wada hadlin muddo lix bilood ah.