MUQDISHO (KAAB TV) – Dib u doorashadii Xasan Sheekh waxaa magaalada muqdisho kusoo badanaayay dhul boobka lagu haayo dhulalka danta guud, hadal heyn badan ayaa ka dhalatay dhul boob inuu ka bilowday Xaruntii cassa Italia oo ku taalla ka soo horjeedk Ex-hotelkii Shabelle ee degmada Xamar weyn ee Muqdisho.
Ciidamo boolis ah ayaa shalay tagay dhulkaas, iyagoo qasab uga kiciyey dad shacab ah oo halkaas ku lahaa maqaayado iyo guryo, kuwaasoo markii dambe la hadlay saxaafada isla markaana sheegay in qoyska Madaxweynaha ay ka dambeeyaan talaabada goobtaas looga kicinayo, kuwaasoo doonaya iney boobaan dhulkaas.
Dhacadadaas ayaa qabsatay baraha bulshada saacadihii la soo dhaafay, waxaana soo baxay maanta warar kale oo sheegaya in dadkii saxaafada la hadlay ee dhulkaas laga kiciyey la jirdilay, laguna xiray saldhiga Boliska ee Xamar weyne.
Baraha bulshada ayaa la soo dhigay sawiro muujinaya qaar a mid ah haweenka la soo xiray oo wejigooda uu dhiig ka muuqdo taasoo ka careysiisay dad badan.
Gudoomiyaha gobolka Banaadir Madaale ayaa la sheegay inuu bixiyey afar bilood ka hor amarka lagu baneynayo dhulkaas sida uu cadeynayo qoraal ka soo baxay xafiiska Madaale sida kucad warqada.
Qoraalka ayaa lagu sheegay in dhulkaas ay dalbatay in loo baneeyo dowladda talyaaniga oo markii horeba laheyd, lamana oga sababta ay muddo afar bilood u qaadatay fulinta amarkaas.
Madaxweyne Xasan Sheekh iyo qoyskiisa ayaa lagu eedeynayaa iney ku lug leeyihiin dhul boob baahsan oo ka socda magaalada Muqdisho, waxaana horey shacabkii degenaa looga kiciyey meelo badan oo uu ku jiro dhulkii guryaha bankaariyada ee ku yaalay agagaarka garoonka Aadan Cadde ee Muqdisho.