Ankara (Kaab TV)– Dadka waddanka Turkiga ayaa maanta markale u dareeri doona codeynta doorashada madaxweynaha Turkiga. Waa markii ugu horeysay abid oo ay dadka reer Turki galayaan doorasho madaxweyne ku-celis ah.
Waxaa hadda la kala dooranaya madaxweynaha xafiiska fadhiya Recep Tayyip Erdoğan iyo hoggaamiyaha isbaheysiga mucaaradka Kemal Kilicdaroglu.
Ku dhawaad 64 Milyan oo qof ayaa codeynaysa maanta, cod-bixinta ayaa bilaaban doonta 8-da aroornimo waxayna ku eeg tahay 5-ta galabnimo.
Iibka khamriga ayaa mamnuuc ah, warbaahinta ayaa sidoo kale xadidan. Madaxweyne Erdoğan ayaa saadaal aan la fileyn kala kulmay doorashadii dhacday 14-kii May, taas oo dad badan siineysa dhiirasho ah inay soo laabasho xooggan u rajeeyan doorashada maanta.
Dhowr arrimood ayaa caawinaya inuu Recep Tayyip Erdoğan shanta sano ee soo aadan uu hoggaamiyo waddanka Turkiga oo uu ku adkaado doorashada ku celiska ah.
Mid waa natiijadii 14-kii May codeyntii dhacday 14-kii May waxay muujisay in Erdoğan uu weli haysto shacbiyad xooggan, maadaama lix xisbi u midowday waxaa la filayay in si fudud uga adkaan karaan, laakiin hadda dadka siyaasadiisa dhaliila waxay kusoo qancayaan in aan la garaaci karin ninkaan.
Kuraasta ugu badan ee Baarlamaanka ayuu xisbigiisu ku adkaaday, taas oo sahlaysa inuu midda madaxweynahana ku adkaado, maadaama madaxweyne aan haysan aqlabiyad Baarlamaan ay adag tahay inuu dalka maamulo oo sharciyo badan uu dhaqan-galiyo.
Dal kasta xisbiga aqlabiyada Baarlamaanka ayaa ku haboon inuu sidoo kale haysto Madaxtooyada, si wada-shaqeyntu u hagaagto.
Midda labaad waa Oğan oo maray dhinaca Erdoğan Hoggaamiyaha ATA İttifakı Sinan Oğan oo kaalinta saddexaad ka galay doorashadii dhacday 14-kii May, ayaa soo maray dhanka Erdoğan, isaga oo sheegay in isbaheysiga mucaaradka aanay soo bandhigin wax loo qaateyn ah oo ay kaga wacan yihiin nidaamkii talinayay labaatankii sano ee lasoo dhaafay.
Ninkan inuu dhinaca Erdoğan maray ayaa madaxweynaha tallada haya siinaysa taageerayaal cusub iyo fursad uu ku adkaan karo maanta.
Reuters iyo Al-Jazeera waxay wareysteen dad badan oo Turki ah, waxay sheegeen in aanay jirin xamaasadii hore ee doorashada.
“Kaliya waajibkeena ayaa gudanayna, laakiin doorashadu inay dhamaatay ayay u eg tahay,” ayay leeyihiin dadka la wareystay.
Qaxootiga ayaa mawduuc weyn ka ah doorashada maanta ka dhaceysa waddanka Turkiga.
Warbaahinta reer galbeedka ayaa badalay qaabkii ay laba asbuuc u odarasayeen doorashada Turkiga, waxayna hadda qorayaan inay u badan tahay in Erdoğan uu sii hoggaamin doono dalkaan xubinta ka ah NATO.
Dunida Muslimka ayaa sidoo kale si weyn looga eegaya doorashada Turkiga ee dhaceysa maanta, maadaama dalkaan uu dhex-taal u yahay loolanka reer Galbeedka iyo Dunida Muslimka.