NAIROBI (KAAB TV) – Dowladda Kenya ayaa ku dhawaaqday in ay diyaar u tahay in ciidamo booliis ah u dirto dalka Haiti si ay gacan uga geestaan la dagaalanka kooxaha burcadda ah ee xasilooni darrada ka wada dalkaasi.
Wasiirka Arrimaha Dibedda ee dalka Kenya ayaa sheegay in dalkiisu uu diri doono Haiti 1,000 askari oo boolis ah, kuwaas oo gacan ka geysta tababarida iyo taageerada ciidamada booliska ee dalka Haiti.
Wasiirka ayaa ku nuux-nuuxsaday in ciidamada booliiska Kenya ay diyaar u yihiin in ay gacan ka siiyaan ciidamada Haiti sidii ay awood ugu yeelan lahaayeen ilaalinta xarumaha muhiimka ah ee dowladda iyo kahor taga falalka ammaan darro.
Xoghayaha Guud ee Qaramada Midoobay Antonio Guterres ayaa si weyn usoo dhaweeyay hadalka Kenya kasoo yeeray ee ku aadan in ay diyaar u yihiin hoggaaminta ciidamo gacan ka geesta xasillooni darada ka jirta dalka Haiti.