Moscow (KAAB TV) – Dowladda Ruushka ayaa qoranaysa askar cusub oo qeyb ka noqonaya milatariga dalkaasi, xilli ciidamo aad u tiro badan oon wali la shaacin inta ay la egyihiin ku dhinteen dagaalka aan wali dhammaan ee ka socda qeybo kamid ah dalka Ukraine.
Sidoo kale, Madaxweyne Putin, ayaa amray in la qoro ciidamo cusub oo gaaraya 160-kun oo askari, kuwaa oo ah dhallinyaro rag ah oo da’dooda u dhaxeyso 18- ilaa 30 sanno jir, waxaana dhallinyaradan la siin doonaa tababar sare si ay ciidamada Ruushka qeyb uga noqdaan.
Dhanka kale, Tirada askartan cusub ee Ruushka qorayo ayaa noqonaya kuwii ugu tirada badnaa tan iyo sanadkii 2011-kii, waxa ayna madax katirsan dowladda Ruushka sheegeen in askartan cusub ee hadda la qorayo aysan ku jirin qorshaha in loo diro dalka Ukraine.
Madaxweyne Vladamir Putin, ayaa dhawaan sheegay in dowladiisa ay kordhineyso tirada guud ee ciidankoooda oo la gaarsiiyo ku dhawaad 2.39 milyan oo askari, halka tirada askarta keydka iyana la gaarsiiyo 1.5 milyan .
Sikastaba, Ciidamada cusub ee Ruushku qoranayo , ayaa kusoo aadaya xilli dowladda Ruushka aysan wali guulo waa weyn aysan ka gaarin dagaalka Ukraine ayna ka cago jiidayaan in xabbad-joojin aqbalaan, taa uu Mareykanka gadaal ka riixayo.