GAALKACYO (KAAB TV) – Faahfaahin dheeraad ah ayaa kasoo baxaysa weerar qaraxyo ku bilawday iyo weerar toos ah oo Al-Shabaab ku qaadday saldhigga ciidamada dowladda Soomaaliya ee Gorgor iyo ciidan dhowaan laga keenay Uganda ay ku lahaayeen deegaanka Cows Weyn ee gobolka Galgaduud ee bartamaha Soomaaliya.
Sida uu shaaciyay Guddoomiye ku Xigeenkii hore ee Amniga gobolka Banaadir, Cali Cabdi Wardheere (Cali Yare), waxaa weerarka lagu dilay askar lagu qiyaasayo 130 illaa 150.
1. Ciidanka dhintay wuxuu u dhexeeyaa 130-150 rag ah,
2. Dhaawaca tiro sax ah lama oga welina gurmad ma helin
3. Maxaabiista cadowga u gacan gashay oo iyaga oo badqaba ama dhaawac ah la kaxeeystay waa tiro udhow 22 nin.
4. Gaadiidka la qabsaday ama cadowgu gubay waa 58 gaari oo tikniko.
5. Beebayaasha aan xabaddu karin waa 23
6. Geerida saraakiisha iyo dhaawaca inta la helay waa tiro ku dhow 43 sarkaal.
“Ciidanka waxaa la weeraray saakay 06:30AM, wuxuuna soo gaaray 09:45 AM, intaas ciidanku waxa ay dagaalameen iyaga oo aan helin gurmad dhulka ah iyo taageero cirka ah (Air Support), Caadi ahaan horay ciidankaan oo kale diyaaradaha ayaa kor ka ilaalin jiray,” ayuu Cali Yare ku yiri qoraal uu ku faafiyay boggiisa Facebook.
“Qasaarada maanta qaranka gaartay wuxuu 4 ujibbaar ka badanyahay midkii Galcad nugu gaaray January 20, 2023 oo aan Xasan tuure ku weeynay,” ayuu sii raaciyay.
Sheegashada Al-Shabaab
Al-Shabaab ayaa soo saartay war saxaafadeed ay ku sheegeyso inay dishay 178 askari.
Al-Shabaab wacxay sheegeen inay weerareen saddex saldhig oo ay degganaayeen 1,500 oo askari, ayna si buuxda ula wareegeen.
Al-Shabaab ayaa soo bandhigay sawirro ku saabsan weerarka Cows Weyne.
Illaa hadda ma jirto wax war ah oo kasoo baxay dhanka taliska ciidamada Soomaaliya iyo Wasaaradda Gaashaandhigga.
Dadka dhaliila nidaamka Xasan Sheekh Maxamuud ayaa ku baaqay in weerarkan qiyaano badan ku jirto loona baahan yahay in baaritaan lagu sameeyo weerarkan.