MUQDISHO (Kaab TV) – Wasiirka Arrimaha Dibadda Soomaaliya, Axmed Macallim Fiqi, ayaa beeniyay wararka sheegaya in Soomaaliya ay ogolaatay in Itoobiya loo fasaxo marin u helista Badda Cas, isaga oo ku tilmaamay wararkaasi kuwo aan sal lahayn.
“Waxaan si cad u beeninayaa sheegashada ah in Itoobiya loo ogolaaday inay hesho marin Badda Cas. Wararkani waa been abuur oo aan waxba ka jirin. Soomaaliya waxay ka go’an tahay inay ilaaliso madaxbannaanideeda iyo inay shacabkeeda si hufan ugu adeegto arrimaha qaran,” ayuu Fiqi ku qoray bartiisa X.
Hadalka Fiqi ayaa yimid kaddib markii warar hore oo loo aaneynayay uu sheegay in Soomaaliya ay ku heshiisay in Itoobiya loo ogolaado marin u helista Badda Cas, iyadoo qayb ka ah heshiiska Ankara Declaration oo uu Turkiga dhex-dhexaadiyay, laguna saxiixay 11-kii Diseembar 2024.
Heshiiska Ankara Declaration ayaa loogu talagalay in lagu soo afjaro xiisadda u dhaxeysay Soomaaliya iyo Itoobiya, taas oo ka dhalatay heshiis ay Itoobiya iyo Somaliland galeen 1-dii Janaayo 2024, kaas oo Itoobiya loogu ogolaaday inay isticmaasho Badda Cas, Somaliland-na ay raadineyso aqoonsi qaranimo.
Heshiiskan ayaa dhigayaa in guddi farsamo oo heer qaran ah la sameeyo si loo xalliyo khilaafaadka ku saabsan badda, iyadoo muddada afar bilood ah lagu soo gabagabeyn doono xallinta khilaafaadka labada dal.
Si kastaba ha ahaatee, heshiiska ayaa abuuray muran weyn, gaar ahaan gudaha Isbahaysiga Saddex Geesoodka ee Soomaaliya, Eritrea, iyo Masar, kuwaas oo ka soo horjeeda damaca Itoobiya ee ku aaddan Badda Cas.
Eritrea iyo Masar waxay u arkaan dadaalka Itoobiya ee marin u helista Badda Cas inuu khatar ku yahay xasilloonida gobolka.
Lataliyaha Wasaaradda Arrimaha Dibadda Eritrea, Cabdulkadir Idriis, ayaa u sheegay BBC Somali in heshiiskaasi uu halis ku yahay madaxbannaanida Soomaaliya isla markaana uu carqaladeyn karo xasilloonida gobolka.
“Heshiiskani waa mid degdeg ah oo aan si fiican looga baaraan degin,” ayuu yiri Idriis, isaga oo ka muujiyay caro ku aaddan sida Soomaaliya ay si dhaqso leh ugu aqbashay heshiiska. Waxa uu sidoo kale ka digay in heshiiska uu wiiqi karo iskaashiga horey u jiray iyo inuu keeni karo khilaaf diblomaasiyadeed.
Arrintan ayaa muujineysa khilaafka sii xoogeysanaya ee ku saabsan marin u helista Badda Cas, taas oo ah marin muhiim ah oo saameyn weyn ku leh siyaasadda iyo dhaqaalaha gobolka.