PARIS, Faransiiska (KAAB TV) – Madaxweynaha dalka Mareykanka Donald Trump, ayaa marar badan ku celiyay in uu doonayo in Mareykanka lawareego Jaziiradda Greenland ee hoostagta Denmark, taas oo caro badan dhalisay si weyna uga soo horjeedo dowladda Denmark.
Sidoo kale, Ciidamo badan oo katirsan milatariga Denmark ayaa la geeyay Jaziiradda Greenland, si ay uga hortagaan in Mareykanka halkaasi qabsado, waxa ay sidoo kale dowladda Denmark raadineysaa taageerada dowladaha Yurub si looga difaaco dulmiga uu Trump ku wado.
Dhanka kale, Wasiirka arrimaha dibadda ee Faransiiska, Jean-Noël Barrot ayaa sheegay in Faransiisku uu kala hadlay Denmark, suurta galnimada in ciidamo la geeyo Greenland, si looga hortago hanjabaada Trump ee la xiriirta inuu doonayo inuu Greenland ku biiriyo Mareykanka.
Waxa uu sheegay Wasiirka, in dhankooda diyaar u yihiin in ay taageero milatari siiyaan Denmark haddii ay dalbadaan, waxa uuna intaa raaciyay in dowladda Denmark, ka gaabsatay hab militari inay Yurub u joojiso damaca Madaxweyne Trump.
Qaar kamid ah waddamada kale ee Yurub, ayaa sidoo kale taageero iyo garab istaag u muujiyay dowladda Denmark oo hadda wajaheysa cadaadis kaga imaanaya Madaxwenaha Mareykanka Trump, oo doonaya in Mareykanka ku biiriyo Jaziiradda Greenland.