NAIROBI (Kaab TV) – Hoggaamiyeyaasha milateriga Burkina Faso Ibraahim Traoré ayaa kala diray guddiga doorashooyinka dalkiisa, iyagoo ku tilmaamay inuu yahay khasaare dhaqaale.
Wasaaradda arrimaha gudaha ayaa mustaqbalka qaban doonta doorashooyinka, sida lagu sheegay warbixin ay baahisay telefishinka dowladda ee RTB TV.
Tan iyo markii ay xukunka la wareegeen bishii Sebteembar 2022, hoggaamiyeyaasha afgambiga waxay bilaabeen isbeddello baaxad leh, oo ay ku jirto dib-u-dhigidda doorashooyinka keeni lahaa in dalka dib loogu celiyo xukun rayid ah.
Dalka oo dhan doorasho ayaa la filayey sanadkii hore, balse golaha milaterigu wuxuu kordhiyay muddada kala guurka dimuqraadiyadda ilaa Luulyo 2029, taasoo u ogolaanaysa hoggaamiyaha Capt Ibraahim Traoré inuu sii hayo awoodda isla markaana uu tartamo doorashada madaxweyne ee xigta.
Wakaaladda wararka AFP ayaa soo xigatay Wasiirka Maamulka Dawladaha Hoose Emile Zerbo oo sheegay in guddiga doorashooyinka la siin jiray miisaaniyad ku dhow $870,000 sanadkii.
‘Faragelinta shisheeyaha’
In guddiga la baabi’iyo wuxuu “xoojinayaa xukunka madaxbannaan ee aan ku leenahay hannaanka doorashada, isla markaana yareynayaa faragelinta shisheeyaha,” ayuu yiri.
Kadib markii ay xukunka la wareegeen saddex sano ka hor, iyadoo lagu eedeynayay in dowladdii rayidka ahayd aysan wax ka qaban karin kacdoonka Islaamiyiinta ee sii kordhaya, milaterigu waxay diideen taageerada ay horey u siin jirtay Faransiiska oo ahayd awooddii gumeysi ee hore, iyagoo u jeestay Ruushka.
Kooxaha xuquuqda aadanaha ayaa tan iyo markaas ku eedeeyay ciidamada milateriga inay beegsanayaan dadka rayidka ah iyagoo doonaya inay ka takhalusaan dagaalyahanada, iyo sidoo kale inay caburinayaan dhaqdhaqaaqyada siyaasadeed iyo xorriyadda hadalka.
Waxaa sidoo kale su’aalo laga keenay waxtarka howlgallada milateriga. Qaybta hore ee sanadka 2025, kooxda jihaadiga ah ee JNIM ayaa sheegtay inay fuliyeen in ka badan 280 weerar gudaha Burkina Faso — taasoo laba jibbaar ka ah tirada weerarradii la diiwaangeliyay isla muddadaas sanadkii 2024.