Muqdisho (KAAB TV) – Warbixin ay dhawaan soo saartay hay’adda Qaramada Midoobay u qaabilsan arrimaha bini’aadantinimada ee OCHA ayaa lagu sheegay in colaadaha ka taagan deegaanada Puntland iyo Shabeellooyinka ay ku barakaceen in ka badan 100,000 oo qof. Xaalada bini’aadantinimo ayaa sii xumaanaysa iyadoo dagaalo ay ka socdaan qaybo kala duwan oo dalka ah.
Sida lagu sheegay warbixinta OCHA, in ka badan 110,000 oo qof ayaa lagu qasbay inay ka barakacaan guryahooda dagaalada ka socda waqooyi bari iyo bartamaha Soomaaliya.
Qaar badan oo ka mid ah dadkan barakacayaasha ah ayaa la sheegay in ay la daalaa dhacayaan sidii ay u heli lahaayeen hoy ku filan iyo waxyaabaha aasaasiga u ah nolosha sida ay wararku sheegayaan
Warbixintu waxa kale oo ay iftiimisay in bilihii la soo dhaafay ay tobanaan kun oo qof ku barakaceen deegaano kale oo dalka ka tirsan, sababo la xidhiidha dagaal beeleedyo soo noqnoqday.
Dagaalladan ayaa sii xumeeyay xaaladdii bini’aadantinimo ee markii horeba aad u liidatay ee gobollada ay dhibaatadu ka dhacday.
Barakacaan ayaa imaanaya iyadoo ay socdaan guluf militari oo ka dhan ah Al-Shabaab.
Dowladda Soomaaliya ayaa bilowday howlgalo adag oo ay kaga hortagayso kooxdaasi, gaar ahaan dagaalada xoogan ee dhacay dhamaadkii bishii February ilaa bartamihii bishii March ee sanadkan.
Dhanka kale Maamulka Puntland ayaa howlgallo ka dhan ah Daacish waxa ay ka wadaan deegaano ka tirsan gobolka Bari. Dadaalladaas ayaa horseeday in dib loo qabsado deegaanno dhowr ah oo ay horay u maamulayeen kooxda xagjirka ah.
Iskahorimaadyada sii kordhaya iyo ololaha militari ee dalka oo dhan ayaa weli cadaadis ku haya hay’adaha samafalka. Hay’adaha gargaarka ayaa ku baaqay gargaar deg deg ah si loo taageero tirada sii kordhaysa ee barakacayaasha kuwaas oo u baahan cunto, hoy iyo daryeel caafimaad.