DOOLOW (KAAB TV) – Maamulka degmada Doolow ee gobolka Gedo ayaa ku soo warramaya in in ka badan 700 oo qof oo barakacayaal ah ay soo gaareen Doolow kadib markii ay ka soo carareen dagaallada ka socda magaalada Luuq.
Colaadan oo saddexdii maalmood ee la soo dhaafay ka taagneed Luuq, ayaa waxay ku lug leedahay laba beelood oo isku haysta dhul la leeyahay.
Xaalad deganaan ah ayaa maanta ka jirta magaalada Luuq, sida uu soo sheegayo wariyaha KAAB TV.
Maleeshiyada beelaha Macalin weyne iyo Gaba weyne ayaa isku haya dhul lahaanshaha, inkastoo ay maxkamadu xukuntay mid aan ku qanacsaneyn labada dhinac.
Maamulka degmada Doolow ayaa xusay in magaalada ay markii horeba la daalaa dhacaysay qulqulka dadka barakacayasha ah, iyadoo ay jiraan gurmadyo kooban oo dhanka cuntada iyo biyaha ah.
Dagaalka oo socday illaa gelinkii dambe ee Jimcihii shalay, ayaa waxaa ku dhintay in ka badan 20-qof oo isugu jira dhinacyadii dagaalamay iyo dad shacab ah. Rabshadaha ayaa sababay khasaare badan oo dheeraad ah.
Axaddii ayaa maalintii saddexaad oo xiriir ah ku soo beegantay rabshado iyo amni darro ka taagan gobolka. Adeegga caafimaadka ayaa ah mid gabaabsi ah, iyadoo isbitaalka yar ee degmada Luuq uusan awoodin inuu wax ka qabto dhaawacyada halista ah.