KISMAAYO (KAAB TV) -Maamulka Jubbaland ayaa ciidamo badan oo ka tirsan kuwa daraawiishta Jubbaland geeyey deegaanada waqooyi ee gobolka Jubada Hoose, halkaasi oo ay weli ka jiraan dhaq dhaqaaqyo Al-Shabaab, waxaana howlgalkan uu qeyb ka yahay howlgallada looga xoreynayo maleeshiyaadka Al-Shabaab.
Telefiishanka ku hadla afka dowladda ayaa Khamiistii sii daayay muuqaal muujinaya ciidamada gobolka oo aad u hubeysan oo dhaq dhaqaaqyo ka sameynaya jiidaha hore ee dagaalka, iyagoo ku biiraya dadaallada ay hormuudka ka yihiin ciidamada dowladda Soomaaliya iyo saaxiibada caalamiga ah.
Howlgalka ugu dambeeyay ayaa daba socda weerar dhawaan ay si wada jir ah u fuliyeen ciidamada Kumaandooska Danab iyo kuwa Daraawiishta Jubbaland ay ku burburiyeen fariisimo ay Al-Shabaab ku lahaayeen gobolkaasi, taasi oo dhabar jab weyn ku noqotay joogitaanka kooxda ee waqooyiga Jubada Hoose.
Saraakiisha Jubbaland ayaa sheegay in ololahan la xoojiyay uu ku wajahan yahay deegaanada ay ka taliyaan Al-Shabaab ee ku yaalla guud ahaan labada Jubbada Hoose iyo Jubbada Dhexe, iyadoo la doonayo in si buuxda loo soo celiyo deegaanadaasi, laguna soo celiyo dowladnimada rayidka.
Bishii la soo dhaafay, dowladda Soomaaliya oo taageero ka heleysa xulafada caalamiga ah ayaa weerar cirka ah ku qaaday magaalada Jilib oo ah saldhigga ugu weyn ee Al-Shabaab ay ka fuliso koonfurta Soomaaliya, waxaana la sheegay in halkaasi uu ka geystay khasaarooyin kala duwan iyo burburka isku xirka hoggaanka kooxda.