NAIROBI (Kaab TV) – Dowladda Kenya ayaa si rasmi ah argagixiso ugu aqoonsatay ururka Al-Islaax ee la xidhiidha Ikhwaan Muslimiinta iyo Xisbul Taxriir, iyagoo la geliyay isla qaybta ay ku jiraan Al-Shabaab iyo kooxaha kale ee xagjirka ah ee horay loo mamnuucay.
Go’aankan ayaa lagu shaaciyey Kenya Gazette Supplement No. 157 oo la daabacay 19-kii Sebtembar 2025, waxaana ku saxiixan Wasiirka Arrimaha Gudaha iyo Maamulka Qaranka ee Kenya, Kipchumba Murkomen, iyadoo la adeegsanayo awoodaha uu siinayo Xeerka Ka Hortagga Argagixisada.
Amarkani wuxuu dambi ka dhigayaa xubinnimada, maalgelinta, xiriirka iyo faafinta afkaarta taageeraysa labada koox.
Al-Islaax, oo ka shaqeeya laba garab oo loo yaqaan Dam Jadiid (Dhiig Cusub) iyo Dam Qadiim (Dhiig Hore), ayaa hore looga mamnuucay inta badan waddamada Carabta, inkastoo weli ay saameyn xooggan ku leedahay Qatar iyo Turkiga.
Gudaha Soomaaliya, Al-Islaax waxay leedahay awood ballaaran, iyadoo xiriir adag ku leh hay’adaha dowladeed, ganacsiga, jaamacadaha iyo shirkadaha gaarka loo leeyahay.
Madaxweynaha Soomaaliya Xasan Sheekh Maxamuud, Ra’iisul Wasaaraha Xamse Cabdi Barre iyo dhowr wasiir oo ka tirsan xukuumadda federaalka ayaa lagu yaqaan xiriir ay la leeyihiin Al-Islaax — taas oo hadda khatar gelinaysa xiriirka Nairobi iyo Muqdisho.
Inkasta oo Ikhwaan Muslimiin iyo Xisbul Taxriir aysan ka fulin weeraro waaweyn gudaha Kenya, haddana hay’adaha sirdoonka ayaa muddo dheer ku eedeeyay in ay ku hawlan yihiin xagjirnimo, qorista qarsoodiga ah iyo xiriir la leh shabakadaha argagixisada caalamiga ah.
Kenya ayaa noqotay waddankii ugu horreeyay ee Bariga Afrika oo mamnuuca Ikhwaan Muslimiin, iyadoo ku biirtay dalalka Masar, Sucuudiga, Imaaraadka Carabta, Baxrayn iyo Ruushka oo horay u liiska geliyay.
Ikhwaan Muslimiin oo la aas aasay Masar sanadkii 1928 ayaa loo arkaa ilbaxnimada siyaasadda Islaamka casriga ah.
Go’aanka Kenya ayaa yimid iyadoo weli ay taagan yihiin khataraha ka imaanaya Al-Shabaab, kooxda ku xidhan al-Qaacida ee Soomaaliya, oo lagu eedeeyay weeraro dhimasho badan dhaliyay sida weerarkii Westgate Mall ee 2013, xasuuqii Jaamacadda Garissa ee 2015, iyo qaraxii hoteelka DusitD2 ee 2019.
Mas’uuliyiinta Kenya waxay sheegeen in mamnuucidda labada koox ay xoojinayso dagaalka dalka ee ka dhanka ah argagixisada, isla markaana ay booliiska iyo hay’adaha amniga siinayso awood dheeraad ah oo ay ku burburiyaan shabakadaha xagjirka ah.
Sidoo kale, waxay muujinaysaa doorka Kenya ee ah inay tahay dal safka hore kaga jira dagaalka caalamiga ah ee lagula jiro argagixisada.