Beydhabo (KAAB TV) – Madaxweynaha dowlad goboleedka Koonfur Galbeed Cabdicasiis Xasan Maxamed Laftagareen, ayaa maanta kulan xasaasi ah la qaatay golihiisa Wasiiradda, waxa uuna kala hadlay xaalada siyaasadeed ee dalka ka jirta xilligan.
Sidoo kale, Laftagareen iyo golihiisa Wasiiradda ayaa kulanka intii uu socday si weyn uga wada hadlay xaalada siyaasadeed ee xiligan ka taagan deegaannada mamaulka Koonfur Galbeed, gaar ahaan khilaafka u dhaxeeya dowladda Federaalka iyo maamulka Koonfur Galbeed.
Dhanka kale, Madaxweynaha Koonfur Galbeed ayaa la wadaagay golihiisa wasiiradda khilaafka hadda ka dhax jira isaga iyo Villa Soomaaliya, waxa uuna ku eedeeyay madaxda dalka in ay ka shaqeenayaan bur burka iyo kala taga maamulka Koonfur Galbeed.
Kulankan maanta uu la yeeshay Madaxweynaha maamulka Koonfur Galbeed Cabdicasiis Laftagareen golihiisa wasiiradda ayaa imaanaya xilli uu jiro khilaaf meel xun gaaray oo ka dhax jira isaga iyo madaxda ugu sarreysa dowladda Federaalka gaar ahaan Madaxweynaha.
Sikastaba, khilaafka udhexeeyo Koonfur Galbeed iyo dowladda dhexe ayaa haatan maraya meeshii ugu xumeed, iyadoo dolwadda federaalka lagu eedeeyay in ay diidantahay in Xildhibaannada kasoo jeeda Koonfur Galbeed aysan usafri karin deeganadooda, waxaana maanta garoonka Aden Cadde laga celiyay Xildhibaan Sareedo oo maanta kusii jeeday magaalada Beydhabo, taas oo ugu sii dartay xiisada ka dhex aloolsan Koonfur Galbeed iyo dowladda Federaalka.