Kismaayo (KAAB TV) – Madaxweynaha Jubaland, Axmed Maxamed Islaam Madoobe oo wareysi bixiyay ayaa ku eedeeyay dowladda Madaxweyne Xasan Sheekh in ay tahay shirkad ku shaqaysa caqliyaddii qabiilka ee wakhtigii dagaallada Sokeeye socdeen (1991).
Sidoo kale, Axmed Madoobe ayaa sheegay in Ra’iisul wasaare Xamse uusan wax awood ah ku lahayn dowladda Xasan Sheekh, islamarkaana waxa uu ku tilmaamay nin shaqaale ah, oo aan waxba laga weydiin go’aannada iyo talada dowladda, taasina lumisay isu dheellitirkii awoodda dowladnimada dalka.
“Dowladdii Soomaaliya maanta waxay noqotay shirkad ku shaqaysa caqliyaddii taallay 1991-dii, waxaana maqan waa awooddii Ra’iisul wasaaraha dalka, oo aysan waxba gacanta ugu jirin cidna aysan waxba weydiin, waana u cudur-daarayaa runtii waa shaqaale shirkadeed isagu” ayuu yiri Madaxweyne Axmed Madoobe.
Axmed Madoobe ayaa dowladda madaxweyne Xasan Sheekh ku eedeeyay in ay ka baxday xayndaabkii Sharciga iyo dastuurkii lagu doortay, kaddib markii sida uu sheegay ay burburisay wax kasta oo Soomaali heshiis ku ahayd, waxaana uu ka digay in taasi keeni karto colaad iyo kala tag.