Baydhabo (KAAB TV) –Madaxweynaha Dowlad Goboleedka Koonfur Galbeed Soomaaliya C/casiis Xasan Maxamed Laftagareen ayaa ku amray ciidamada ammaanka inay qaadaan tallaabo adag oo lagu xaqiijinayo xasiloonida magaalada Baydhabo ee xarunta maamulkaasi, iyadoo ay sii kordhayaan xiisadaha siyaasadeed.
Awaamiir uu soo saaray laamaha ammaanka ee gobolka, ayuu Laftagareen uga digay isku day kasta oo lagu wiiqayo awoodda siyaasadeed ee maamulkiisa, isagoo ku baaqay in “gacmo adag” loo wajaho wax kasta oo liddi ku ah amniga guud.
“Ciidanka ammaanku waa inay si cad uga hortagaan cid kasta oo isku dayda inay khalkhal geliyaan magaalada ama ay ka hor yimaadaan maamulka Koonfur Galbeed,” ayuu yiri madaxweynaha.
Hadalkiisa waxaa ka dhawaajiyay Wasiirka Amniga Dowlad Goboleedka Koonfur Galbeed, Xasan C/qaadir oo ay aad isugu dhow yihiin Laftagareen, wuxuuna caddeeyay in wixii hadda ka dambeeya aan loo dulqaadan doonin in hub aan la ogolayn lagu dhex wato Baydhabo.
“Waa inaan hub sharci darro ah lagu arki karin Baydhabo – kaliya ciidamada dowladda iyo kuwa la aqoonsan yahay ayaa loo ogol yahay inay hub qaataan,” ayuu wasiirku ka digay.
Tallaabooyinka amniga lagu adkeynayo ayaa imaanaya iyadoo magaalada Muqdisho uu u muuqdo mid sii xumaanaya xiriirka ka dhaxeeya dowlad goboleedka Koonfur Galbeed iyo dowladda federaalka, iyadoo labada dhinac ay sii kordhayaan shakiga midba midka kale ka leeyahay.
Mas’uuliyiinta deegaanka ayaa sheegay in khilaafkan uu ka tarjumayo xurguf ballaaran oo u dhexeysa madaxda dowladda federaalka iyo kuwa maamul goboleedyada, taasoo sii adkeyn karta dadaallada lagu sugayo nabadda iyo xasilloonida siyaasadda dalka ee jilicsan.
Ma jiro war rasmi ah oo ka soo baxay Villa Somalia [Somali state House] oo ku aadan hadaladii dhawaan ka soo yeeray maamulka Koonfur Galbeed ee fadhigoodu yahay Baydhabo.