Hargeysa (KAAB TV) – Madaxweynaha maamulka Soomaaliland Cabdiraxmaan Maxamed Cabdullaahi Ciro ayaa maanta socdaal shaqo ku tagey taliska ciidanka Asluubta ee Soomaaliland.
Madaxweyne Ciro ayaa waxaa taliska ciidanka Asluubta kusoo dhaweeyay taliyaha ciidanaka Asluubta Soomaaliland sareeye guud Axmed Cawaale Yuusuf, iyo sarakiisha qeybaha kala duwan ee ciidanka Asluubta Soomaaliland.
Taliyaha ciidanka Asluubta Soomaaliland sareeye gaas Axmed Cawaale Yuusuf ayaa warbixin kooban ka siiyay madaxweynaha xaalada guud ee taliska ciidanka Asluubta, iyo sida ay udaryeelaan maxaabiista ay gacanta ku hayaan.
Sidoo kale, madaxweyne Ciro oo khudbad kooban ujeediyay taliska ciidanka Asluubta Soomaaliland, ayaa ku bogaadiyay ciidanka Asluubta howsha baaxada leh ee ay u hayaan bulshada reer Soomaaliland.
Ugudambeyntii, madaxweyne Ciro ayaa ciidanka ku dhiirigaliyay in xukuumadiisu ay mudnaan koowaad siin doonto ciidamada qalabka sida ee Soomaaliland, isagoona xusay in ciidanka Asluubta ay qeyb ka yihiin mushaar kordhinta ciidanka Soomaaliland loo sameynaayo.
