MUQDISHO (KAAB TV) – Dhanka maamulka, Madaxweyne Xasan Sheekh Maxamuud ayaa si rasmi ah ugu dhawaaqay in Gubadlee, Daarusalaam, iyo Garasbaaley ay yihiin degmooyin ka tirsan gobolka Banaadir. Ku dhawaaqistaan ayaa kordhisay tirada guud ee degmooyinka gobolka Banaadir oo laga dhigay labaatan.
Yuusuf Xuseen Jimcaale, Guddoomiyaha Gobolka Banaadir ahna Duqa Magaalada Muqdisho, ayaa muujiyay sida uu u taageersan yahay go’aanka Madaxweynaha. Waxa uu xusay in deegaanadaasi ay soo buuxiyeen dhammaan shuruudihii looga baahnaa si ay degmooyin u noqdaan, haatanna ay heli doonaan maqaam iyo adeegyo la mid ah kuwa degmooyinka kale ee G/Banaadir.
“Degmooyinka cusub ee G/Banaadir waxaa looga baahan yahay inay hirgeliyaan adeegyada muhiimka ah sida saldhigyada, amniga, cadaaladda, iyo xafiisyada canshuuraha” ayuu yiri duqa magaalada Jimcaale. Sidoo kale waxa uu sheegay in uu kaalin mug leh ka qaatay Axmed Macallin Fiqi oo hadda ah Wasiirka Arrimaha Dibadda, isagoo si weyn uga qeyb qaatay howshan mudadii uu ahaa Wasiirka Arrimaha Gudaha, Federaalka iyo Dib u heshiisiinta.
Duqa magaalada ayaa ku nuux-nuux saday muhiimadda ay leedahay nidaamka maamulka iyo bixinta adeegyada, isagoo tilmaamay in aqoonsiga degmooyinkan ay fududeynayaan maamul wanaagga iyo horumarinta kaabayaasha dhaqaalaha. Wuxuu kaloo xusay in loo baahan yahay in la sii wado dadaallada lagu xaqiijinayo in degmooyinkaas ay si buuxda uga mid noqdaan hannaanka maamul ee gobolka.
Gobolka Banaadir oo hadda ka kooban 20 degmo ayaa waxaa ka mid ah.
Warta Nabadda
Howlwadaag
Hodan
Waaberi
Xamarwayne
Xamar-jajab
Shangaani
Boondheere
Shibis
Cabdicasiis
Kaaraan
Yaaqshiid
Hiliwaa
Dayniile
Wadajir
Dharkaynley
Kaxda(Kaxda)
Daarusalaam
Gubadlee
Garasbaaley
Go’aanka Madaxweynaha ayaa astaan u ah dadaallada kor loogu qaadayo maamulka deegaanka iyo bixinta adeegyada bulshada ee Muqdisho iyo deegaanada hoos yimaada. Marka la isku daro Gubadlee, Daarusalaam, Garasbaaley, dowladdu waxay hiigsaneysaa sidii gobolladaas ay u heli lahaayeen taageerada lagama maarmaanka ah si ay u horumaraan, ugana qeyb qaataan horumarka guud ee gobolka Banaadir.