MUQDISHO (Kaab TV) –Madaxweynaha Jamhuuriyadda Federaalka Soomaaliya Hassan Sheikh Mohamud ayaa lagu wadaa inuu berri safar rasmi ah ku tago dalka Djibouti, kaas oo la qorsheynayo inuu socdo muddo laba maalmood ah, sida ay sheegeen ilo wareedyo rasmi ah.
Safarkan ayaa qeyb ka ah dadaallada diblomaasiyadeed ee lagu xoojinayo xiriirka iyo iskaashiga u dhexeeya labada dal ee deriska ah.
Inta uu ku sugan yahay Djibouti, Madaxweyne Xasan Sheekh ayaa la filayaa inuu kulamo la yeesho madaxda sare ee dalkaas oo uu ugu horreeyo Madaxweynaha Jabuuti Ismail Omar Guelleh. Kulamadan ayaa la filayaa in diiradda lagu saaro xoojinta xiriirka siyaasadeed, iskaashiga dhinacyada amniga iyo dhaqaalaha, iyo arrimo kale oo muhiim u ah xasilloonida iyo horumarka gobolka Geeska Afrika.
Sidoo kale, labada dhinac ayaa la filayaa inay ka wada hadlaan iskaashiga la dagaallanka argagixisada, maadaama Somalia iyo Djibouti ay si dhow uga wada shaqeeyaan arrimaha amniga, gaar ahaan hawlgallada ka dhanka ah kooxda Al-Shabaab ee ka dagaallanta gudaha Soomaaliya.
Dhanka kale, safarkan ayaa ku soo beegmaya xilli ay labada dalba wajahayaan xaalado siyaasadeed oo muhiim ah, iyadoo madaxda Djibouti iyo Somalia ay dhawaan geli doonaan doorashooyin. Madaxweynaha Jabuuti Ismail Omar Guelleh ayaa la filayaa inuu mar kale u tartamo doorashada madaxtinimada ee la qorsheeyay inay qabsoonto bisha April.
Madaxweyne Hassan Sheikh Mohamud ayaa isna dhowaan helay muddo sanad dheeri ah oo xilka ah kadib wax ka beddel lagu sameeyay dastuurka dalka Somalia. Si kastaba ha ahaatee, weli lama oga sida ay u hirgeli doonto geeddi-socodka doorashada soo socota iyo sida ay u wajahaan dhinacyada siyaasadda ee dalka.