MUQDISHO (KAAB TV) – Saddex ka mid ah diyaaradaha caalamiga ee yimaada garoonka Aadan Cadde ee magaalada Muqdisho ayaa baajiyay duulimaadyadoodii maanta oo Talaado ah ku iman lahaayeen Muqdisho.
Diyaaradda FlyDubai, Qatar Airways iyo Turkish Airline ayaa baajiyay safarkooda, iyadoo dadkii rakaabka ee tikidhada heystay loo sheegay inaysan wax safar ah jirin maanta.
Barta la socodka duulimaadyada caalamiga ee Flightradar.com ayaa lagu baahiyay jadwalka diyaaradaha baaqday maanta ee iman lahaa garoonka Muqdisho.
Arrintan ayaa soo baxday saacado ka dib markii Safaaradda Mareykanku ay shaacisay digniin amni oo la xiriirta weeraro laga cabsi qabo in lala beegsado goobo muhiim ah oo ku yaalla Muqdisho, oo uu ku jiro garoonka Aadan Cadde.
Safaaradda Mareykanka ayaa shaacisay inay hakisay dhammaan safarka shaqaaleheeda safaaradda ee Muqdisho.
Waxay Safaaraddu kula talisay muwaadiniinteeda inay ka waantoobaan socdaalka gudaha Muqdisho.