BOSASO (KAAB TV) –Mareykanka ayaa duqeymo isdaba joog ah oo habeenimo ah ka fuliyay saldhigyada Daacish (ISIS) ee dooxada Baallacade ee Soomaaliya, iyadoo uu socdo guluf dagaal oo ay wadaan ciidamada maamul goboleedka Puntland ee dagaalka kula jira dagaalyahanada mintidiinta ah ee ku sugan buuraha Calmiskaad.
Sida laga soo xigtay saraakiisha ammaanka ee maxalliga ah, duqeymaha ayaa billowday galinkii dambe ee Sabtidii waxayna sii socdeen saacadihii hore ee Axadda, waxaana lala beegsaday deegaanka Maraagade—oo ah goob ay ku xooggan yihiin Daacish oo caan ku ah dhul adag iyo shabakad isku xiran oo godad ah. Dadka ku dhaqan qeybo ka mid ah magaalada Boosaaso ayaa soo sheegaya in ay maqlayeen qaraxyo xilliyada habeenkii ah.
Diyaaradaha aan duuliyaha lahayn ayaa sidoo kale lagu soo waramayaa inay duqeeyeen goobo xiriir la leh Daacish oo ku dhow deegaanka Biyo Kulule, ka dib markii xog laga helay taliyeyaasha Puntland oo todobaadyadii la soo dhaafay soo bandhigay dhaqdhaqaaqyo ciidan.
Ciidamada ammaanka Puntland oo khasaare dhimasho iyo dhaawacba leh ka soo gaaray dagaalladii cuslaa ee Jimcihii dhacay, ayaa hakiyay hawlgallada dhulka, iyadoo saraakiisha ciidamaduna ay qiimeynayaan saameynta ay ku yeelatay duqeynta. Hawlgallada nadiifinta ayaa waxaa adkeeyay dhulka buuraleyda ah iyo fariisimaha dagaalyahannada.
Xiisaddii u dambeysay ayaa ka dhigan mid ka mid ah iska hor imaadyadii ugu waaweynaa ee dhex maray ciidamada Puntland iyo Daacish bilihii lasoo dhaafay, iyadoo dowlad goboleedka ay xoojisay dadaallada lagu doonayo in lagu baabi’iyo joogitaanka kooxda ee Waqooyi Bari Soomaaliya.