Wasiirka Arrimaha Dibadda Masar, Dr. Badr Cabdilcaati, ayaa magaalada Paris kulan kula yeeshay Xoghayaha Arrimaha Dibadda Mareykanka, Marco Rubio, kaas oo ay kaga wada hadleen xaaladda gobolka Geeska Afrika, amniga Badda Cas iyo xiriirka labada dal.
Intii uu socday kulanka, wasiirka Masar ayaa carrabka ku adkeeyay muhiimadda ay leedahay ilaalinta madax-bannaanida, midnimada iyo wadajirka dhuleed ee dalalka Geeska Afrika, isagoo sheegay in loo baahan yahay iskaashi lagu xaqiijinayo xasilloonida gobolka.
Soomaaliya ayaa ka mid ah dalalka ay arrintani si gaar ah u khuseyso, maadaama ay ku taallo goob istaraatiiji ah oo isku xirta Badweynta Hindiya, Gacanka Cadmeed iyo Badda Cas.
Labada wasiir ayaa sidoo kale ka hadlay amniga Badda Cas, iyagoo isku raacay in la xoojiyo iskaashiga gobolka iyo kan caalamiga ah si loo ilaaliyo maraakiibta ganacsiga iyo isu-socodka badeecadaha caalamka.
Badda Cas iyo Gacanka Cadmeed ayaa ka mid ah marin-biyoodka ugu muhiimsan dunida, waxaana isticmaala maraakiib ganacsi oo isaga kala goosha qaaradaha Afrika, Aasiya iyo Yurub.
Labada wasiir ayaa ugu dambeyn isku raacay inay sii wadaan wada-shaqeynta iyo isku-duwidda dadaallada diblomaasiyadeed.
Kulankan ayaa imaanaya xilli Geeska Afrika uu wajahayo isbeddello siyaasadeed iyo amni, iyadoo Soomaaliya ay muhiimad weyn u leedahay tartanka diblomaasiyadeed iyo danaha amni ee dalalka gobolka.