Maxaa Loo Maxkamadayn Waayay Jeneraalada iyo Madaxda Sare ee Lagu Eedeeyay Ka Bixitaanka Furimaha Dagaalka?

|

Su’aalo ayaa ka taagan sida ay dowladda Soomaaliya ula xisaabtanto saraakiisha iyo madaxda ciidamada ee lagu eedeeyo inay ku fashilmeen hoggaaminta dagaallada ka dhanka ah Al-Shabaab, gaar ahaan xilliyada ay ciidamada dowladda la kulmaan weerarro culus iyo dib-u-gurashooyin.

Dhacdooyinkii ka dhacay Cowswayne, Caad, Aadan Yabaal, Maxaas iyo Moqokori ayaa mar kale soo nooleeyay doodda ku saabsan mas’uuliyadda taliyeyaasha ciidamada iyo sababta aan loo arkin baaritaanno iyo maxkamadayn si cad u taabanaya madaxda sare.

Dadka arrintan dhaliilaya waxay isweydiinayaan sababta askarta iyo saraakiisha hoose loogu qaado tallaabooyin ciqaabeed marka lagu eedeeyo inay ka baxeen goobaha dagaalka, halka madaxda sare ee lagu eedeeyo inay ka tageen furimaha ama ay ku fashilmeen qorsheynta howlgalada aan si muuqata loola xisaabtamin.

Arrintan waxaa si gaar ah loogu soo qaadaa dhacdadii Aadan Yabaal, halkaas oo weerar xooggan oo Al-Shabaab ay ku qaadeen degmada uu dhaliyay su’aalo ku saabsan hoggaankii ciidamada iyo habkii loo maareeyay difaaca deegaanka.

Jeneraal Odawaa Yuusuf Raage, oo xilligaas ahaa Taliyihii Ciidanka Xoogga Dalka, iyo Kornayl Xasan Cali Nuur Shuute, oo ahaa Guddoomiyaha Maxkamadda Ciidamada Qalabka Sida, ayaa ka mid ahaa saraakiishii magacyadooda lagu soo qaaday doodaha ku saabsan dhacdadaas.

Doodda ayaa sidoo kale ku saabsan Howlgalkii Banooda iyo dagaalkii Jameeco, kaas oo dhaliyay su’aalo la xiriira qorsheynta howlgalka, amarradii la bixiyay, gurmadkii ciidamada iyo khasaaraha soo gaaray askarta dowladda.

Warar iyo eedeymo soo baxay ayaa tilmaamaya in ay jiraan galal iyo dukumentiyo la xiriira howlgalka oo ay ku jiraan faahfaahin aan weli si buuxda loo shaacin. Waxaa sidoo kale la hadal hayaa amarro dagaal iyo go’aanno la sheegay inay ciidamada geliyeen xaalado halis ah.

DHEERAAD:  Dhuusamareeb iyo Jowhar: Laba caleema-saar oo ay hareeyeen duruufo siyaasadeed oo kala duwan

Haddii dukumentiyadaasi jiraan oo ay muujinayaan khaladaad culus oo dhinaca hoggaaminta iyo qorsheynta ah, waxaa muhiim ah in hay’adaha dowladda ay baaritaan ku sameeyaan, lana ogaado cidda bixisay amarrada, cidda fulisay iyo halka ay ka dhacday masuuliyad-darradu.

Dadka dhaliilaya maamulka ciidamada waxay ku doodaan in aan la aqbali karin in askari hoose lagu maxkamadeeyo inuu ka baxay goob dagaal, halka taliyeyaasha go’aannada waaweyn gaaraya aan la weydiin sababta keentay guuldarrooyinka iyo khasaaraha ciidamada.

Waxaa intaas dheer eedeymo siyaasadeed oo sheegaya in xilalka sare iyo xiriirrada qabiilka ay saameyn ku yeelan karaan sida loola xisaabtamo mas’uuliyiinta. Eedeymahaas waxay sii xoojinayaan shakiga shacabka ee ku saabsan sinnaanta sharciga iyo madax-bannaanida hay’adaha garsoorka.

Dowladda Xasan Sheekh Maxamuud waxaa laga doonayaa inay caddeyso in sharcigu qof walba ka sarreeyo, isla markaana aanay jirin cid xilkeeda, awooddeeda ama xiriirkeeda siyaasadeed awgiis uga badbaadi karta baaritaan.

Maxkamadda Ciidamada Qalabka Sida iyo hay’adaha kale ee amniga waxaa looga baahan yahay inay si hufan u baaraan dhacdooyinkii waaweynaa ee ciidamada ku qabsaday furimaha dagaalka, gaar ahaan Aadan Yabaal iyo Howlgalkii Banooda.

Baaritaan kasta waa inuu ku salaysnaadaa caddeymo, waxaana fursad loo siinayaa dadka lagu eedeeyo inay iska difaacaan eedeymaha loo jeediyo. Sidoo kale, waa in shacabka loo soo bandhigaa natiijooyinka baaritaannada si loo helo kalsoonida ciidamada iyo bulshada.

Ugu dambeyn, su’aasha ugu weyn ee taagan ayaa ah sababta aan loo arkin isla xisaabtan la taaban karo oo ku wajahan taliyeyaasha iyo madaxda sare ee lagu eedeeyo khaladaadka dagaalka, iyadoo askarta hoose ay mararka qaar wajahaan maxkamadayn iyo ciqaab.

La Xiriira

Live Now

Baraheenna Bulshada

Baaritaanada

English News