ROME (KAAB TV) – Warar goordhow soo baxay ayaa daaha ka qaadaya kulan magaalada Rome ee dalka Talyaaniga ku dhexmaray Madaxweyne Xasan Sheekh Maxamuud iyo Madaxweyne ku Xigeenka Kenya Rigathi Gachagua.
Labada mas’uul ayaa dalka Talyaaniga u jooga Shirka Nidaamyada Cuntada ee Qaramada Midoobay oo ay qabanqaabisay hay’adda Qaramada Midoobay ee FAO.
Madaxtooyada Soomaaliya way iska ilaalisay inay baahiso sawirrada kulankan, iyo inay ka hadasho xitaa inuu kulankan dhacay.
Hase yeeshee, Madaxweyne ku Xigeenka Kenya Rigathi Gachagua ayaa ku baahiyay boggiisa Twitter-ka in dadkii uu la kulmay ay ka mid ahaayeen wafdiga Soomaaliya ee uu hoggaaminayo Madaxweyne Xasan Sheekh Maxamuud.
On Monday, the Prime Minister of Italy Giorgia Meloni hosted us to a working lunch during the UN Food Systems Summit+2 in Rome, where we discussed partnerships for sustainable food systems, among other pertinent issues.
A key request was on the need to fast-track resumption of… pic.twitter.com/ObPilgCG25
— H.E. Rigathi Gachagua, EGH (@rigathi) July 24, 2023
“Waxaan sidoo kale ka wada hadalnay arrimaha muhiimka u ah gobolka Geeska Afrika iyadoo ay goobjoog ka ahaayeen madax kale oo ay ka mid yihiin Ra’iisul Wasaaraha Itoobiya Abiy Axmed iyo Madaxweynaha Soomaaliya Xasan Sheekh Maxamuud,” ayuu yiri Madaxweyne ku Xigeenka Kenya.
Khilaafka badda ee Kenya iyo Soomaaliya
Ma cadda in dhab ahaan madaxda Soomaaliya iyo Kenya ay ka wada hadleen arrinta badda markale, waxaana wararkan loo qariyay si weyn illaa hadda.
Soomaaliya iyo Kenya waxaa muddo dheer ka dhex aloosnaa muran ku saabsan dhanka soohdinta badda. Waxaana kiiskan ku guuleystay Soomaaliya ka dib markii ay go’aan kasoo saartay Maxkamadda Caalamiga ee Caddaaladda (ICJ) bishii Oktoobar 2021.
Maxkamadda ayaa diiday sheegashadii Kenya ee ahayd lahaanshaha qeybo badan oo ka mid ah dhul-badeedka, iyadoo loo xukumay in inta badan dhul-badeedkaasi uu yahay mid ay leedahay Soomaaliya.
Kenya ayaa khasaare weyn kala kulantay arrintan waayo waxay ku qasban tahay inay dib u celiso lacago ay ka qaadatay shirkado caalami ah oo kula heshiiyay in ay shidaal ka baaraan dhul-badeedka la isku heystay oo hadda noqday mid ay Soomaaliya leedahay.
Shirkadaha heshiiska kula galay Kenya, waxaa ka mid ah shirkadda ENI ee dalka Talyaaniga. ENI waxay shidaal baaris ka waddaa jasiiradda Lamu ee Kenya.
Waxaa dhowaan soo if baxday in dowladda Jabuuti ay dooneyso inay dhex dhexcaadin kale ka furto arrinta badda, si Soomaaliya ay u oggolaato in 50% ay Kenya qaadato wax-soo-saarka badda, iyo in ENI loo ogolaado inay sii wadato hawlihii baarista shidaalka taasoo Kenya ka badbaadineysa inay dib u celiso lacagihii ay ka qaadatay shirkadda ENI.
Shirkadda ENI ayaa muddo dadaal ugu jirtay sidii ay labada dhinac ee Kenya iyo Soomaaliya isugu keeni lahayd. Waxaana arrintaasi ku lug yeeshay dowladda Talyaaniga oo Ra’isul Wasaaraheeda Giorgia Meloni, kulan kula yeelatay Madaxweyne Xasan Sheekh Maxamuud magaalada Addis Ababa ee dalka Itoobiya bishii Abriil 2023 mar uu halkaasi u tagay shir.
Xasan Sheekh ayaa isaguna dhankiisa saanad hub iyo rasaas weydiistay dowladda Talyaaniga.