Nairobi: Sidee loo afduubay xildhibaano ka tirsan Baarlamaanka Soomaaliya?

|

NAIROBI, Kenya (Kaab TV) – Waxaa xalay fiidkii magaalada Nairobi muddo kooban lagu afduubtay labo xildhibaan oo ka tirsan Baarlamaanka Soomaaliya, kuwaasoo ku sugnaa hotel ku yaalla Nairobi.

Sida ay xaqiijiyeen mudanayaal la socday labada xildhibaan oo kala ah xildhibaan Xasan Cabdinuur iyo xildhibaan Axmed Cabdi Kooshin oo uu wehliyo xildhibaan saddexaad oo lagu magacaabo Cali Mahdi Qalato ayaa waxaa lagu horgeeyay baabuur nooca yar yar ah oo ay wateen rag ka tirsan ciidamada ammaanka Kenya.

“Saddexda xildhibaan labo ayaa hore socotay midna wuu yara danbeeyay markay hotelka kasoo bexeen. Waxaa markiiba hortooda kasoo muuqday baabuur yar oo ay saarnaayeen rag ka tirsan ciidamada amaanka waxayna kexeysteen labada xildhibaan ee kala ah Xasan Cabdinuur (oo reer Koonfur Galbeed ah) iyo Axmed Cabdi Kooshin (oo reer Somaliland ah),” ayuu yiri xildhibaan ku sugan Nairobi oo xilliga falku dhacay joogay goobta hotelka.

Xildhibaanka saddexaad Cali Mahdi Qalato (oo reer Puntland ah) ayaa la sheegayaa inuu ka fakaday falka, halka labada kale lagu qaatay baabuurka.

Waxaa xusid mudan in Xasan Cabdinuur uu ahaa musharraxii Sheekh Aadan Madoobe kula tartamay xilka Guddoomiyaha Baarlamaanka.

Ilo wareedyo ku sugan Nairibo ayaa Kaab TV u sheegay in beryahan uu socday mooshin xil ka qaadis ah oo ka dhan ah Ra’isul Wasaare Xamse Cabdi Barre kaasoo shirar ku saabsan ay ka socdaan Nairobi.

Xildhibaanada ayaa muddo saacad ah lagu dhex haayay baabuurka ka dibna waa lasoo fasaxay markii la ogaaday in arrinta ay warbaahinta gashay oo dad badan ay ogaadeen.

Xildhibaannada dhacdada ku dhacday ayaa la filayaa in maanta oo Khamiis ah ka hadlaan dhacdadan.

Magaalada Nairobi ee caasimadda dalka Kenya waxaa horey loogu qafaashay siyaasiyiin uu ka mid yahay Cabdirashiid Janan oo sida la sheegay ku lug lahaa dhaqdhaqaaqyo ka dhan ah maamulka Jubbaland.

Ma jirto wax war ah oo dowladda Soomaaliya, gaar ahaan xafiiska Raisul Wasaare Xamse oo falkan lagu tuhmaayo, kasoo baxay.

Sidoo kale dowladda Kenya kama hadlin dhacdadan.

La Xiriira

Live Now

Baraheenna Bulshada

Baaritaanada

English News