GAROWE (Kaab TV) – Kooxda kubadda cagta ee Nugaal ayaa galabta ciyaar ka dhacday Garoowe 3-2 uga adkaatay kooxda Mudug, taasoo u suurtogelisay inay u gudubto finalka tartanka.
Guuldarradan ayaa sidoo kale soo afjartay rajadii Mudug ee tartanka.
Ciyaarta ayaa ahayd mid adag oo xiiso leh, iyadoo labada kooxood ay barbaro 2-2 ku ahaayeen inta badan waqtiga ciyaarta.
Si kastaba ha ahaatee, Nugaal ayaa guusha ku xaqiijisay gool rigoore ah oo ay ku dhaliyeen daqiiqadihii ugu dambeeyay.
Kooxda Mudug ayaa kadib cabasho ka gudbisay garsoorihii ciyaarta, iyagoo ku eedeeyay inuu si eexasho ah u maamulay.
Si kastaba ha ahaatee, labada dhinac ayaa ugu dambeyn aqbalay natiijada ciyaarta.
Tartanka kubadda cagta ee Puntland oo billowday 10-kii Diseembar ayaa lagu wadaa inuu soo dhammaado toddobaadka soo socda, iyadoo ciyaarta kama dambaysta ah lagu balansan yahay inay dhacdo Isniinta.