Muqdisho (KAAB TV) -Madaxweynaha dawladda Faderaalka ee Soomaaliya ayaa dhowaan fidiyey casuumaad ku aaddan kulan siyaasadeed, inkastoo uusan xafiiskiisu tafaasiil ka bixin qaabka loo qabanqaabinayo, cidda ka qaybgeli doonta iyo goorta la qabanayo.
Madaxweynaha ayaa ku tilmaamay ka soo qeyb galayaasha in ay yihiin “Siyaasiyiin iyo mas’uuliyiin ka tirsan bulshada” oo ka qeyb qaadan doona dagaalka ka dhanka ah Al-Shabaab iyo horumarinta dowlad casri ah.
Martiqaadkan ayaa taageero ballaaran ka helay siyaasiyiin dhowr ah oo dhaliilsan hanaanka hoggaamineed ee madaxweynaha.
Si kastaba ha ahaatee, iyadoo qaar ka mid ah ay rajo wanaagsan ka muujiyeen oo ay sheegeen inay ka war sugi doonaan sida qorshahan loo maareynayo, ayaa haddana Ra’iisul Wasaarihii hore ee Soomaaliya Maxamed Xuseen Rooble iyo Agaasimihii hore ee NISA Fahad Yaasiin Xaaji Daahir ayaa si buuxda u taageeray baaqa Madaxweynaha iyadoo aan wax shuruud ah lagu xirin.
Madaxweynaha Jubbaland Axmed Maxamed Islaam (Axmed Madoobe) oo shacabka kula hadlayay magaalada Kismaayo intii lagu jiray tukashada salaada Ciidul Adxaa ayaa sheegay inay taageersan yihiin dadaalka uu wado Madaxweyne Xasan Sheekh Maxamuud.
Madaxweyne Madoobe ayaa hoosta ka xarriiqay muhiimadda uu leeyahay hindisahan oo uu ku sifeeyey fursad muhiim ah oo dalka loogu midoobi karo dagaalka ka dhanka ah Al-Shabaab.
Madoobe ayaa ku nuux-nuux saday in Soomaaliya ay muhiimad gaar ah siineyso sidii looga adkaan lahaa Al-shabaab, isagoo ku booriyay dhinacyada siyaasadda isku haya inay dhinac iska dhigaan khilaafyada dhexdooda ah, ayna xoogga saaraan hadafka la wadaago.
Si kastaba ha ahaatee, Madaxweynaha Puntland Siciid Cabdullaahi Deni ayaan si rasmi ah uga jawaabin. Taas bedelkeeda, Wasiirka Warfaafinta Puntland ayaa sheegay in maamulku uusan diyaar u ahayn ka qayb galka, isagoo sabab uga dhigay arrimo amni iyo colaado ka taagan gobolka.
Lama hubo in mawqifyadan ay is bedeli doonaan maalmaha soo socda iyo in kale, iyadoo la rumeysan yahay in labada mas’uul ay ka mid yihiin mas’uuliyiinta ugu badan ee culeyska siyaasadeed ku haya la macaamilka dowladda Federaalka Soomaaliya tan iyo markii la qaatay nidaamka federaalka.