MUQDISHO (KAAB TV) -Qaramada Midoobay ayaa labo baabuur oo kuwa dagaalka ah oo kuwa dagaalka ah ugu deeqday ciidamada Uganda ee ka howlgala Soomaaliya, taasoo si weyn u xoojisay awooddooda wax looga qabanayo dhibaatooyinka iyo ilaalinta shaqaalaha Qaramada Midoobay.
Gaadiidkan ayaa si rasmi ah 22-kii May, 2025, loogu wareejiyay Ciidanka Difaaca Dadka Uganda (UPDF) ee hoos taga Ciidanka Ilaalada Qaramada Midoobay (UNGU XI), oo qaabilsan ilaalinta shaqaalaha iyo xarumaha Qaramada Midoobay ee ku yaalla caasimadda Soomaaliya iyo nawaaxigeeda.
Madaxa Xafiiska Taageerada Qaramada Midoobay ee Soomaaliya (UNSOS) Manon Richard oo ka hadlay xil wareejinta oo ka dhacday magaalada Muqdisho ayaa bogaadiyay xirfadda iyo asluubta ciidamada UPDF.
“Waan ka mahadcelineynaa tababarka wanaagsan ee cutubka iyo wadashaqeynta. Baabuurtan ayaa kor u qaadi doona dhaqdhaqaaqa iyo hufnaanta hawlgalka, gaar ahaan Kooxda Waxqabadka Degdegga ah inta lagu jiro xiisadaha,” ayay tiri.
IFV-yada, loogu talagalay in si degdeg ah loo geeyo meelaha khatarta sare leh, ayaa la filayaa in ay xoojiyaan awoodda UPDF si ay si degdeg ah uga jawaabaan khataraha amniga iyo xaaladaha degdegga ah ee bini’aadantinimo.
Lt. Col. Peter Ruyogoza Barigye, oo ah taliyaha UNGU XI, ayaa ku tilmaamay deeqdan mid aad u muhiim ah oo kor loogu qaadayo awoodda unugga si ay u gutaan waajibaadkooda.
“Taageeradan muhiimka ah ee Qaramada Midoobay waxay si weyn u wanaajinaysaa waxtarkayaga hawlgal,” ayuu yidhi. “Gaadiidkan ayaa gacan ka geysan doona xaqiijinta amniga labadeena ciidankeena iyo guud ahaan bulshada Qaramada Midoobay.”
Kabtan Eric Mugabe Mugwani, oo hogaaminaya Kooxda Gurmadka Degdegga ah, ayaa carrabka ku adkeeyay saameynta istaraatiijiga ah ee gawaarida cusub.
IFV-yadani waxay xoojin doonaan awoodahayada wax ka qabashada xaaladaha degdegga ah,” ayuu yidhi, “Waan ka mahadcelinaynaa taageerada joogtada ah.”
Taliyaasha sare ee ciidamada UPDF iyo shaqaalaha UNGU XI ayaa ka soo qeyb galay xaflada, kuwaas oo muujiyay kor u kaca howlgallada diirada lagu saarayo dhaq-dhaqaaqa iyo ilaalinta iyadoo ay jirto xaalada amni ee Soomaaliya oo aan xasilooneyn.
Uganda ayaa Soomaaliya u soo daabuleysay ciidammo ka tirsan qeybta ilaalada Qaramada Midoobay tan iyo sannadkii 2014-kii, kaddib markii ay codsatay in la xoojiyo howlgallada ammaanka ee Qaramada Midoobay ay ka waddo dalkaas. UNGU XI waxa ay ka dhigan tahay wareegtada kow iyo tobnaad ee ciidamada Uganda ee hoos imaanaya waajibaadkan.