South Korea (KAAB TV) – Inta laxaqiijiyay 178 qof ayaa ku dhimatay shil diyaaradeed oo saakay ka dhacay garoonka diyaaradaha caalamiga ah ee magaalada Muan ee dalka Kuuriyada Koofureed.
Sidoo kale, Shilka ayaa yimid kaddib marki diyaaradda Jeju oo wadday rakaab gaaraya 181 qof ay ka baxday dariiqa ay diyaaradaha ku ordan marka ay duulayaan iyo marka ay soo dagayaan, sidaasi waxaa xaqiijisay wakaaladda wararka Kuuriya ee Yonhap.
Dhanka kale, diyaaraddan ayaa ka soo duushay dalka Thailand, waxana ay ku wajahneyd magaalada Muan ee koofurta South Korea. Dab ayaa qabsaday diyaaradda kaddib marki ay darbi ku dhacday sida ay xaqiijiyeen saraakiisha.
Wakaaladda Qaran ee Dabdabiska ayaa sheegtay in dabka intiisa badan la damiyay isla markaana ay wali socdaan howlaha gurmadka.
178 ka qof ee dhintay ayaa la sheegay in ay u dhinteen dabka. 32 gaadiidka dab damiska iyo diyaaradaha qummaatiga u kaca ayaa ka qeybgalaya howlaha dab damiska.
Afhayeen u hadlay shirkadda Jeju ee diyaaraddani leh ayaa sheegay in ay billaabayaan baaritaanno ku saabsan sababta keentay shilkani.
