LAASCAANOOD (Kaab TV) Waxaa maanta magaalada Laascaanood ka furmay shir ay ka qeybgalayaan dhaqanka iyo qeybaha bulshada ee deegaanada gobolka Sool loogana tashanayo aayaha deegaankaasi.
Shirweynahan oo ay ku dhawaaqeen odayaasha dhaqanka beelaha Sool ayaa daba jooga kacdoonkii bishii December 2022 ka bilawday magaalada Laascaanood kaasoo ay ku dhinteen in ka badan 20 ruux ka dib markii ciidanka Somaliland ay rasaas u adeegsadeen shacab bannaanbaxyo ka dhigayey magaalada Laascaanood ee xarunta gobolka Sool.
Shirkan ayaa qorshihiisu yimid ka dib rabshado weli socda oo ka dhacay magaalada Laascaanood kuwaasoo ka danbeeyay dilal loo geystay haldoorka gobolka Sool oo ay dadweynuhu ka caroodeen. Ciidamada Somaliland ayaa kadibna rasaas u adeegsaday dadweyne mudaharaadyo xiriir ah ka dhigayey magaalada Laascaanood taasoo dhalisay dhimasho in ka badan 20 ruux iyo dhaawac tiro badan.
Garaad Jaamac Garaad Ismaaciil, oo ka mid ah madax dhaqamadeedka ugu caansan ee shirkan abaabulay, ayaa furitaanka shirkan ka sheegay inuu isagu dhigay gogosha uuna uga gol leeyahay in dadka deegaanka reer Sool ay iska wareystaan aayahooda.
“Gogosha annaa dhigay laakiin taladu wey inoo wada taallaa oo ninna gaar uma laha waayo wadada la marayo ayaa adag. Abwaan Cali Dhuuxna wuxuu yidhi ‘waxaan uubateeyoba tolkay oodda soo jebiye’ maanta waad dhan tihiin sow maaha,” ayuu yiri Garaad Jaamac Garaad Ismaaciil.
Aayaha deegaanadda Sool, Sanaag iyo Ceyn
