HARGEYSA (KAAB TV) -Wasiirka Warfaafinta Somaliland, Cali Maxamed Xasan ayaa ku eedeeyay Dowladda Soomaaliya iyo hay’adeeda sirdoonka ee NISA inay jirdil ku hayso dhallinyaro kasoo jeedaa Hargeysa oo ku xiran Muqdisho.
Wasiirka ayaa sheegay in dhallinyarada qaarkood la dilay, halka qaar kale oo ay xirtay hay’adda NISA lagu qasbaayo inay qirtaan dembiyo, sida uu yiri wasiirka, aysan gelin.
“Dhallinyaro ayaa jirta oo inaga xiran Xamar, oo u shaqeyn jiray waaxda socdaalka Soomaaliya, oo qaarna la dilay kuwii kalana ay xirxiran yihiin. Wararka aanu heleyno waxaa ka mid ah in la jirdilaayo, oo eheladoodii inay arkaan loo diiday, qasab la doonayo in lagu yeelsiiyo waxaanay qabin,” ayuu yiri Wasiirka Warfaafinta Somaliland.
Somaliland’s Info. Minister Ali Hassan says young men from Hargeisa currently detained in Mogadishu are being tortured in an attempt to make confession of crimes.
“There are young men detained in Mogadishu, who used to work for the Somali Aviation. Some of them were killed while… pic.twitter.com/AeiVyJJTpy
— Kaab Somali TV (@KaabTV) April 12, 2024
Baaqa QM iyo hay’adaha xuquuqda aadanaha
Wasiirka Warfaafinta Somaliland ayaa baaq u jeediyay Qaramada Midoobay iyo hay’adaha xuquuqda aadanaha inay kasoo warbixiyaan dhallinyarada xir-xiran, maadaama ehelkooda aan loo ogoleyn inay arkaan.
“Waxaanu leenahay cid kasta, ama QM ama xuquuqda aadanaha ka shaqeeya, waa inay dadkaas soo eegaan war rasmiya ka keenaan,” ayuu yiri Wasiir Cali Maxamed Xasan.
Wuxuu ku eedeeyay Dowladda Soomaaliya inay falal cadawtinimo leh kula dhaqmeyso dadka kasoo jeeda Somaliland.
“Dowladda meeshaa ka jirta iyo hay’adeeda sirdoonka waxay doonayaan inay horraantoodiina laayeen, kuwa kalana ku qasbaan waxaanay qabin. Wax Soomaali iyo bani’aadam ka dhexeeyaan ma aha,” ayuu yiri Wasiirka Warfaafinta Somaliland Cali Maxamed Xasan.
Dhallinyarada xir-xiran oo tiradooda lagu sheegay illaa 9 ayaa la xiray ka dib dilkii Cadinaasir Muuse Dahable oo lagu ceejiyay gurigiisa magaalada Muqdisho 18kii Febraayo 2024.
Hay’adda NISA oo xirtay dhallinyaradan ayaan wax war ah kasoo saarin illaa hadda. Waxaana si weyn loo tuhunsan yahay in dilka Dahable uu ahaa mid siyaasadeed oo ay qeyb ahan ku lug leedahay hay’adda NISA.