Wasaaradda Batroolka iyo Macdanta ee Xukuumadda Federaalka Soomaaliya ayaa sheegtay in dabayaaqada sanadkan la soo gabagabeyn doono sahaminta Shidaalka ee uu Turkigu ka wado dalka Turkiga.
Shirka Golaha Wasiirada oo uu shir guddoominayay Ra’iisul Wasaare Xamza Cabdi Barre ayaa Wasaaradda Batroolka iyo Macdanta waxa ay warbixin ka siisay halka ay marayaan howlaha sahaminta Shidaalka iyo caqabadaha hortaagan.
Wasaaraddu waxa ay golaha wasiirada u xaqiijisay in ka hor dhamaadka sanadkan la dhamaystiri doono Sahanka 3D Seismic Survey, kaas oo looga gol leeyahay in lagu ogaado kaydka kaydka shidaalka. Tani waxay u gogol xaaraysaa wejiga xiga ee qodista ceelasha shidaalka.
Markabka Oruc Reis oo laga leeyahay dalka Turkiga ayaa bishii October ee sanadkii hore soo gaaray Dekedda magaalada Muqdisho, ka hor inta aan loo galbin xeebaha Galmudug, halkaasi oo uu ka bilaabay sahaminta Shidaalka iyo Gaaska Dabiiciga ah ee Xeebaha Soomaaliya.
Markabkan oo la dhisay sanadkii 2017-kii kana mid ah maraakiibta ugu casrisan ee uu sameeyay Turkiga ayaa la filayaa in uu door muhiim ah ka qaato dadaalka ay Soomaaliya ugu jirto ka faa’ideysiga kheyraadka shidaalka. Haddii soo saarista shidaalku ay noqoto mid guulaysata, waxa ay si weyn uga qayb qaadan kartaa kobaca dhaqaalaha dalka.