MUQDISHO (Kaab TV) – Waaxda difaaca Mareykanka ayaa xaqiijisay hawlgal qorsheysan oo ciidamada Mareykanka ka fuliyeen waqooyiga bari ee Soomaaliya, gaar ahaan buuraleyda Galgala Arbacadii laguna dilay sarkaal sare oo ka tirsan kooxda Daacish (ISIS) ee Soomaaliya ka hawlgasha.
Xoghayaha Difaaca Mareykanka Lloyd J. Austin III ayaa sheegay in maalintii Arbacadii ciidanka Mareykanka waxay ka fuliyeen Waqooyiga Soomaaliya weerar ay ku dileen xubno badan oo ka tirsan Daacish, oo uu ku jiro Bilaal Al-Sudani, oo ahaa Hogaamiyihii Daacish ee Soomaaliya, isla markaana ahaa fududeeyaha ugu muhiimsan Daacish.
“Shabakadda caalamiga ee Al-Sudani waxa ay mas’uul ka ahayd kobcinta joogitaanka sii kordhaya ee kooxda ISIS ee Afrika iyo maalgelinta hawlgallada kooxda ee adduunka oo dhan, oo ay ku jirto Afgaanistaan,” ayuu xoghayaha difaaca Mareykanka Lloyd J. Austin III.
Weerar dhulka ah
Xoghayaha Difaaca Mareykanka Lloyd J. Austin ayaa intaa ku daray in hawlgalkan oo ahaa weerar dhulka ah oo ka dhacay buuraley ku taalla degaanada Puntland.
“Tallaabadani waxay ka dhigaysaa Mareykanka iyo saaxiibadiisa kuwo ammaan ah, waxayna ka tarjumeysaa sida ay nooga go’an tahay in aan Maraykanka ka ilaalinno khatarta argagixisada gudaha iyo dibaddaba. Ma jirto dad rayid ah oo wax ku noqotay howlgalkan,” ayuu sii raaciyay hadalkiisa Xoghayaha Difaaca Mareykanka Lloyd J. Austin.
“Waxaan u mahadcelineynaa xubnahayada adeegga aan caadiga ahayn iyo sidoo kale bulshadayada sirdoonka iyo la-hawlgalayaasha kale ee hay’adaha kale ee gacan ka geysta hawlgalkan guul-darrada ah ee ka dhanka ah argagixisada,” Xoghayaha Difaaca Mareykanka Lloyd J. Austin.
Weerarka oo ahaa mid ciidamada Mareykanku ka dul degeen Al Suudaani ayaa waxaa lagu dilay ugu yaraan 10 kale oo ka tirsan kooxda Daacish.
Kumuu ahaa Al-Sudani?
Al-Sudani, oo sanado badan ay isha ku hayeen saraakiisha sirdoonka Mareykanka, ayaa door muhiim ah ka qaatay maalgelinta howlgallada Daacish ee Afrika iyo sidoo kale laanta Daacish ee Afghanistan ee ISIS-K, sida uu sheegay Austin.
Sirdoonka Mareykanka uu muddo indhaha ku hayey dhaqdhaqaaqa Al-Sudani ayaa rumeysan inuu xitaa abaabulay in kooxda Daacish ay dad ka qorato waddamada Afrikada koonfureed iyo in lacago ay u kala diraan waddamo ku yaalla qaaradda Afrika oo ay kooxdu si xawli ah ugu sii fideysay dhowaanahan.
Waaxda maaliyadda ee Mareykanka ayaa sannadkii hore tuhuntay in Al-Sudani uu si dhow ula shaqeeyay sarkaal kale oo ka tirsan Daacish, Abdella Hussein Abadigga, kaasi oo dhallinyaro ka qoray Koonfur Afrika una diray xero lagu tababaro.