Dhuusmareeb (KAAB ) Wararka maanta oo Arbaca ah KAAB uu ka helayo degmada Dhuusmareeb ee gobolka galgaduud ayaa sheegaya in halkaas dagaal uu ku dhaxmaray laba maleeshiyo beeleed.
Dagaalkan ayaa ka dhacay duleedka degmada Dhuusmareeb gaar ahaan halka loo yaqaano , Ilix oo hoostaga degaanka Ceeldheere.
Goobjoogayaal ayaa sheegaya in halkaas maanta laga maqalayay jugta hubka culus ee ay is waydaarsanayeen labada maleeshiyo beeleed ee wada dega deegaanka Ilix .
Maalmihii la soo dhaafay waxaa deegaankaas ka taaganaa xiisada labadan maleeshiyo beeleed , waxana lagu guul daraystay in la xaliyo beelahan oo khilaafkooda uu ka dhashay muran dhul.
Labada dhinac ayaa la sheegay in ay iska dileen dhawr qof oo ilaa iyo hadda la shaacin tira ahaan waxase jira dhaawacyo la gaarsiiyay isbitaalada magaalada dhuusmareeb.
Maamulka Galmudug weli kama hadlin colaadaan ka jirta degaanno hoostaga Dhuusamareeb, waxaana dagaalka uu kusoo aadayaa xilli Maanta ay tahay Maalinta Koowaad ee Ciida Carafo.