KISMAAYO (Kaab TV) – Wariye maxalli ah, Abshir Khalif Shidane, ayaa lagu toogtay sarkaal boolis ah xilli uu marayay Kismaayo habeenimadii Isniinta, sida ay sheegeen booliska Jubbaland.
Afhayeenka Booliska Jubbaland, Dhamme Shukri Faarax Ducaale, ayaa xaqiijiyay dhacdada, isagoo sheegay in sarkaalka ka dambeeyay toogashada la qabtay oo hadda gacanta lagu hayo.
Sida la soo wariyay, wariyuhu wuxuu marayay jidka markuu sarkaalka boolisku furey rasaas.
Sababta dhabta ah ee toogashada weli lama shaacin, hase ahaatee afhayeenka booliska ayaa sheegay in wariyaha iyo askariga dilka geystay ay is af dhaafeen ama murmeen.
Abshir Khalif Shidane, 25 jir, wuxuu ahaa kaameraman ka shaqeeyay shirkadda gaarka loo leeyahay ee Horn Connect, Muqdisho, sidoo kalena ka hor intaas ka shaqeyn jiray Radio Waamo iyo Jubaland State TV.
Dilkaan ayaa ah weerar kale oo lagu qaaday wariyeyaasha Soomaaliya, iyadoo dalka uu wali wajahayo cadaalad-darro iyo ciqaab la’aan ku saabsan dambiyada lagula kaco shaqaalaha warbaahinta.