Muqdisho (KAAB TV) -Xiisada ka taagan Soomaaliya ayaa sare u sii kaceysa iyadoo madaxda mucaaradka iyo ururada bulshada rayidka ay walaac ka muujinayaan sida ay dowladda Soomaaliya uga go’an tahay qabashada doorasho hal qof iyo hal cod ah oo muddo dheer la filayey ka hor inta aysan dhammaanin xilkeeda 2026-ka.
Madaxweyne Xasan Sheekh Maxamuud ayaa marar badan ku adkeystay inaysan jiri doonin muddo kororsi, isagoo ballan qaaday in doorasho qof iyo cod ah ay ku dhici doonto xilliga dastuuriga ah ee hadda jira.
Si kastaba ha ahaatee, dadka dhaliila ayaa sheegaya in dowladdu ay ku guul-darreysatay inay bixiso khariidad cad oo waqti ku xiran oo loogu talagalay codbixinta dadweynaha, taasoo haddii la qabto noqon doonta tii ugu horreysay muddo nus qarni ka badan.
Xisbiyada mucaaradka oo ay wehliyaan maamul goboleedyada Puntland iyo Jubbaland ayaa Villa Somalia ku eedeeyay inay ka weecday heshiisyadii siyaasadeed ee horey loogu gaaray hanaanka doorashada.
Waxa kale oo ay ka digayaan in wakhtigu uu gabaabsi yahay, iyadoo muddo ku dhow siddeed bilood ay ka hadhsan tahay xilka dawladda, isla markaana aanay weli bilaabmin doorashooyin dawladaha hoose.
Ismari waaga socda ayaa sii xoojiyey shakiga ka dhex jira mucaaradka, kuwaas oo ku andacoonaya in madaxtooyadu ay si hoose u diyaarinayso qorshayaal kale oo ay ku doonayso inay ku kordhiso xukunka.
Waxay kaloo ku andacoonayaan in doodaha socda ee ku saabsan wax ka bedelka dastuurka iyo khalkhalgelinta siyaasadeed si bareer ah loo adeegsanayo si looga weeciyo wax ay ku tilmaameen diyaar-garow doorasho oo dhab ah.
Dowladda federaalka ayaan weli si rasmi ah uga jawaabin eedeymahan. Si kastaba ha ahaatee, xaaladda ayaa weli ah mid kacsan, iyadoo dadka siyaasadda indha indheeya iyo shacabka Soomaaliyeedba ay si dhow isha ugu hayaan tallaabada xigta ee Villa Somalia.
Khubarada siyaasadda oo la hadlay Idaacadda Shabelle ayaa ka digaya in haddii aan si dhaqsi ah loo helin dariiq siyaasadeed oo hufan oo loo wada dhan yahay, uu dalku halis ugu jiro in uu galo xaalad kale oo shaki siyaasadeed.