LONDON (KAAB TV) – Aaaladda WhatsApp, oo ah barnaamij ay ku wada xiriiraan balaayiin dad ah ayaa muddo kooban hawada ka maqnaa habeennimadii Arbacadii, sida ay xaqiijisay shirkadda Meta oo iska leh WhatsApp.
Adeegga ayaa la soo celiyay wax yar ka dib 5.10pm ET ka dib ku dhawaad nus saac oo uu hawada ka maqnaa.
Barta DownDetector oo la socota dhaq-dhaqaaqyada baraha internet-ka ayaa sheegtay in abaarihii 4:30pm ET ay bilaabatay cilladda WhatsApp.
Shirkadda WhatsApp ayaa dhankeeda ka hadashay cilladdan.
“Waxaan si dhaqso ah uga shaqeyneynaa sidii aan u xallin lahayn cillad dhanka isku xirnaanta WhatsApp waxaanan ku soo celin doonaa hawada sida ugu dhaqsaha badan,” ayay shirkaddu ku tiri barteeda Twitter-ka.
Nus saac ka dib, shirkaddu waxay sheegtay in adeeggii dib loo soo celiyay.
“Hadda waan soo laabannay, wada sheekeysi farxad leh!” ayay soo qortay WhatsApp.
WhatsApp ayaa si weyn looga isticmaalaa adduunka oo dhan, iyadoo ku faanta in ka badan 2 bilyan oo macaamiil firfircoon ay ku leedahay daafaha dunida, sida ay sheegtay barta Statista oo tirakoobta isticmaalayaasha baraha bulshada ee adduunyada.