Xiisad amni oo ka taagan Beledweyne: Rasaas habeenkii la maqlayo iyo ciidamo waddooyinka la dhigay

|

Xaalad amni oo walaac leh ayaa laga soo sheegayaa magaalada Beledweyne ee xarunta gobolka Hiiraan, halkaas oo habeenkii laga maqlayo rasaas goos-goos ah oo si weyn looga dareemayo xaafado ka tirsan magaalada, taasoo cabsi xooggan ku abuurtay dadka rayidka ah.

Dadka ku nool magaalada ayaa wajahaya walaac la xiriira xaaladda amni, iyadoo dhawaaqyada rasaasta habeenkii laga maqlayo qeybo kala duwan oo Beledweyne ah ay sare u qaadeen shakiga laga qabo in magaalada ay ka jirto xiisad amni iyo mid siyaasadeed.

Sida ay sheegeen ilo deegaanka ah, rasaasta la maqlayo ayaa noqotay arrin walaac ku abuurtay shacabka, kuwaas oo ka cabsi qaba in xiisadaha jira ay isu beddelaan iska horimaad hubeysan oo saameeya amniga magaalada.

xaaladdan ayaa ku soo beegmaysa xilli ay gobolka Hiiraan ka jiraan dhaqdhaqaaqyo siyaasadeed iyo khilaafaad la xiriira maamulka, ciidamada iyo awoodda ay dhinacyada kala duwan ku leeyihiin gobolka.

Wararka laga helayo ilo deegaanka ah ayaa sheegaya in waddooyinka soo gala magaalada Beledweyne ay ku sugan yihiin ciidamo kala duwan oo taageersan dhinacyo siyaasadeed oo iska soo horjeeda.

Ciidamada qaarkood ayaa la sheegay inay xiriir la leeyihiin dhinacyada taageersan hoggaanka dhaqanka ee beesha Xawaadle, halka kuwo kalena ay taageersan yihiin maamulka Hirshabelle.

Joogitaanka ciidamada kala duwan ee waddooyinka iyo goobaha muhiimka ah ayaa sii kordhinaya dareenka amni-darro, iyadoo shacabka ay ka cabsi qabaan in muranka siyaasadeed uu isu beddelo iska horimaad hubeysan.

DHEERAAD:  Xildhibaan Saadaq oo Aadan Madoobe ku eedeeyay aflagaaddo

Ilaa hadda, ma jiraan faahfaahin madax-bannaan oo xaqiijinaysa tirada ciidamada, goobaha saxda ah ee ay ku sugan yihiin iyo sababta rasaasta habeenkii loo maqlayo.

Xiisadda amni ee Beledweyne waxay qeyb ka tahay khilaaf siyaasadeed oo muddooyinkii dambe ka dhex jiray maamulka Hirshabelle iyo siyaasiyiinta, odayaasha dhaqanka iyo qeybaha bulshada ee gobolka Hiiraan.

Khilaafka ayaa si weyn u xoogeysanayay kaddib doorashadii 24-kii Oktoobar ee Madaxweyne Cali Guudlaawe iyo Madaxweyne ku-xigeen Cabdifitaax Xasan Afrax, taas oo ay diideen siyaasiyiin iyo hoggaamiyeyaal dhaqameed ka tirsan Hiiraan.

7-dii Nofeembar, Madaxweyne ku-xigeenka Hirshabelle Cabdifitaax Xasan Afrax iyo siyaasiga Cabdullaahi Maxamed Cali Sanbaloolshe ayaa Beledweyne ku tegay iyagoo wata ilaalado hubeysan, taasoo dhalisay dhaq-dhaqaaqyo ciidan iyo walaac laga qabo iska horimaad.

Dhanka kale, Ugaas Yuusuf Ugaas Xasan Ugaas Khaliif ayaa baaq u diray ciidamada ka soo jeeda Hiiraan, isagoo ugu yeeray inay yimaadaan Beledweyne, taasoo sii xoojisay dareenka siyaasadeed iyo kan amni.

Magaalada Beledweyne waxaa ka socda dhaqdhaqaaqyo siyaasadeed oo xooggan, iyadoo dhinacyada isku haya maamulka Hirshabelle ay mid walba isku dayayaan inay xoojiyaan mowqifkooda siyaasadeed.

Qeybo ka mid ah hoggaamiyeyaasha dhaqanka iyo siyaasiyiinta Hiiraan ayaa dalbanaya in dib loo eego qaabka maamulka Hirshabelle loo dhisay, lana helo heshiis xaqiijinaya matalaad siyaasadeed iyo wada-tashi dhab ah.

Dhinaca kale, taageerayaasha maamulka Hirshabelle waxay doonayaan in maamulka cusub uu si buuxda uga howlgalo gobolka, taasoo abuureysa is-mariwaa siyaasadeed oo aan weli xal rasmi ah laga gaarin.

Warbixinno hore ayaa sidoo kale sheegay in maleeshiyaad Macawiisley ah ay la wareegeen qeybo ka mid ah xarunta maamulka gobolka Hiiraan ee Lamagalaay, taasoo muujineysa sida khilaafku uga gudbay hadallada siyaasadeed una saameeyay xarumaha maamulka.

DHEERAAD:  Dowladd goboleedka Puntland oo mamnuucday ineysan mucaaradka hub la'imaan karin Garoowe

Dadka rayidka ah ayaa ah kuwa ugu nugul xaalad kasta oo amni-darro ah oo ka dhalata magaalada.

Haddii rasaasta habeenkii la maqlayo iyo dhaq-dhaqaaqyada ciidamada ay sii socdaan, waxaa dhici karta in ganacsiga, isu-socodka bulshada iyo adeegyada muhiimka ah ay saameyn ku yeeshaan.

Shacabka ayaa sidoo kale ka cabsi qaba in khilaafka siyaasadeed uu sababo barakac hor leh, gaar ahaan haddii ay dhacaan iska horimaadyo u dhexeeya ciidamada kala aragti duwan.

Beledweyne waa magaalo muhiim u ah gobolka Hiiraan, waxaana xasilloonideedu saameyn toos ah ku leedahay deegaannada kale ee gobolka iyo dagaalka ka dhanka ah Al-Shabaab.

Xaaladda taagan waxay u baahan tahay in Dowladda Federaalka, maamulka Hirshabelle, hoggaanka dhaqanka iyo siyaasiyiinta Hiiraan ay qaadaan tallaabooyin degdeg ah oo lagu dejinayo xiisadda.

La Xiriira

Live Now

Baraheenna Bulshada

Baaritaanada

English News